Жыл басынан бері Түркістан да «Таза Қазақстан» бағдарламасы аясындағы жұмыстарға 500 мыңнан астам адам қатысып, 16 мың тоннадан астам қоқыс шығарылды. Бұл көрсеткіш өңірде тазалық пен абаттандыру шараларының кең ауқымда жүргізіліп жатқанын ғана емес, тұрғындардың қоршаған ортаны қорғауға деген жауапкершілігі артып келе жатқанын да көрсетеді.
Мемлекет басшысының бастамасымен қолға алынған «Таза Қазақстан» бағдарламасы аясында қоршаған ортаны қорғау, елді мекендердің тазалығын сақтау, абаттандыру және көгалдандыру бағытында жүйелі жұмыстар жүргізілуде. Жыл басынан бері өңірде 15-тен астам ірі экологиялық акция ұйымдастырылды. Сонымен қатар әрбір елді мекен бойынша 7 257 іс-шарадан тұратын жоспар бекітіліп, бүгінгі таңда оның 4 515-і орындалды.
«Тазару күні», «Тазалық эстафетасы», «ТазаLIKE» экофестивалі, «Халықаралық қалдықсыз күні», «Мөлдір бұлақ», «Таза қала», «Таза ауыл», «Таза аула», «Жасыл болашақ», «Таза су айдындары», «Орман өрттерінің алдын алу шаралары» секілді акциялар тұрғындардың табиғатқа деген жанашырлығын арттыруға бағытталды. Аудандарда «Бір адам – бір ағаш», «Талмен түлеген туған жер», «Парктер шеруі», «Жасыл белдеу» сияқты бастамалар жүзеге асырылып, көгалдандыру жұмыстарына қоғамның белсенді қатысуы қамтамасыз етілуде.
Жалпы атқарылған экологиялық іс-шараларға 476,2 мың тұрғын мен 1 222 арнайы техника жұмылдырылып, нәтижесінде 16 391 тонна қоқыс шығарылды. Бұл ретте басты мақсат тек қоқысты жинап шығару емес, қалдық көлемін азайту және оны тиімді басқару мәдениетін қалыптастыру болуы тиіс.
Осы тұрғыдан алғанда, «Таза Қазақстан» бағдарламасы жасыл экономика қағидаттарымен тікелей сабақтас. Жасыл экономика табиғи ресурстарды ұқыпты пайдалануға, қалдықтарды азайтуға, қайта өңдеуді дамытуға және қоршаған ортаға келетін зиянды төмендетуге бағытталған. Сондықтан қоқысты жинау жұмыстарымен қатар оны сұрыптау, қайта өңдеуге жарамды қалдықтарды бөлек жинау және жауапты тұтыну мәдениетін қалыптастырудың маңызы зор.
Экологиялық мәселелерді жедел анықтап, шешуге мүмкіндік беретін TAZAQAZBOT онлайн-платформасы да белсенді қолданылуда. Жыл басынан бері тұрғындардан келіп түскен 2 267 өтінім бойынша кері байланыс берілді. Бұл – тұрғындардың өз аумағының тазалығына бейжай қарамай, қоғамдық бақылауға қатысып отырғанының белгісі.
Экологиялық мәдениетті қалыптастыру жұмыстары білім беру саласында да жалғасуда. Жыл басынан бері 18 256-ға жуық экологиялық тәрбие сағаты, 560 сурет байқауы, 4 669 дөңгелек үстел және 68 акция ұйымдастырылды. Сонымен қатар білім беру ұйымдарында «Жасыл мектеп» жобасы іске асырылуда.
Жобаның негізгі мақсаты – ресурстарды ұқыпты әрі тиімді пайдалану, жауапты тұтыну мәдениетін қалыптастыру және қалдықтарды бөлек жинауға үйрету. Бұл бағыт жас ұрпақтың экологиялық сауаттылығын арттырып қана қоймай, болашақта табиғи ресурстарды ысырап етпейтін қоғам қалыптастыруға негіз болады.
Жаз айларында да қоршаған ортаны қорғауға бағытталған ауқымды акциялар өткізілді. «Дүниежүзілік қоршаған ортаны қорғау күні», «Экологтар күні», «Таза су айдындары», «Орман өрттерінің алдын алу шаралары» тақырыптарындағы іс-шараларға 63,2 мың тұрғын мен 560 арнайы техника жұмылдырылып, 14 747 тонна қоқыс шығарылды. TAZAQAZBOT платформасы арқылы 2 112 өтінімге кері байланыс берілді.
Түркістан облысындағы тазалық жұмыстары көгалдандырумен де ұштасып келеді. Көшелер мен аулалар, саябақтар мен скверлер, арық-атыздар және ортақ пайдаланылатын аумақтар тазартылып, ретке келтірілуде. Ағаштарды күтіп-баптау, жаңа көшеттер отырғызу, жасыл белдеулерді кеңейту – өңірдің экологиялық ахуалын жақсартудың маңызды тетігі.
Көгалдандырудың маңызы әсіресе табиғи-климаттық жағдайы күрделі өңірлер үшін жоғары. Жасыл желек ауаның сапасын жақсартып, шаң-тозаңды азайтады, елді мекендердің микроклиматын қалыптастыруға ықпал етеді. Бұл ретте су ресурстарын тиімді пайдалану, тамшылатып және үнемді суару технологияларын енгізу де маңызды.
«Таза Қазақстан» – бір реттік акция емес, тазалық пен тәртіпті күнделікті өмір салтына айналдыруға бағытталған ортақ бастама. Оның түпкі нәтижесі жиналған қоқыс көлемімен ғана емес, адамдардың табиғатқа деген көзқарасының өзгеруімен өлшенеді.
Таза аула, көгалданған көше, сұрыпталған қалдық, үнемделген су мен энергия – жасыл экономиканың күнделікті өмірдегі қарапайым көріністері. Сондықтан қоршаған ортаны қорғау мемлекеттік органдардың ғана емес, кәсіпкерлердің, қоғамдық ұйымдардың, жастардың және әрбір тұрғынның ортақ міндеті.
Түркістан облысында бұл бағыттағы жұмыстардың жалғасуы өңірдің экологиялық тұрақтылығын күшейтіп, табиғи ресурстарды тиімді пайдалануға және жасыл экономика қағидаттарын орнықтыруға мүмкіндік береді. Ең бастысы – тазалықты науқан емес, ұрпақтан ұрпаққа берілетін мәдениетке айналдыру.
