Өзбекәлі Жәнібеков атындағы Оңтүстік Қазақстан педагогикалық университетінің Басқарма төрағасы – Ректоры Қайрат Балабиев биыл алғашқы талапкерлерін қабылдаған Гази университеті филиалының жұмысын жандандыру және ғылыми-білім беру бағытындағы ынтымақтастықты кеңейту мақсатында Түркия республикасына арнайы іссапармен барды.
Қазақстандық делегация құрамында сондай-ақ, ректор кеңесшісі Мұқаш Ескендіров, Ғылыми жұмыстар және инновациялар жөніндегі проректор Ержан Керімбеков бар.
Іссапар барысында делегация Гази университетінің ректоры, профессор Угур Уналмен кездесті. Кездесуде Гази университеті мен Өзбекәлі Жәнібеков атындағы ОҚПУ арасындағы ынтымақтастықты одан әрі дамыту мәселелері талқыланды. Тараптар Гази университеті филиалының қызметін халықаралық академиялық білім беру стандарттарына сәйкестендірумен қатар, ғылыми-зерттеу бағытындағы бірлескен жұмыстарды күшейтуге басымдық берді. Атап айтқанда, ортақ ғылыми жобаларды әзірлеу және жүзеге асыру, зерттеу жұмыстарына профессор-оқытушылар құрамын тарту, докторантура бағытындағы академиялық байланыстарды дамыту жөнінде нақты шешімдер қабылданды.
Іссапар аясында Қазақстандық делегация Гази, Анкара және Таяу Шығыс техникалық университеттерінің бірлескен ғылыми-зерттеу орталығы – NÖROM (neuroscience and neurotechnology excellence joint application and research center) жұмысымен танысты. Nörom – үш жетекші университеттің ғылыми әлеуетін біріктіріп, нейроғылым және нейротехнология бағыттарында іргелі және қолданбалы зерттеулер жүргізуге арналған ғылыми-зерттеу хабы. Орталық аясында заманауи зертханалар жұмыс істеп, ғалымдардың бірлескен зерттеу жобаларын жүзеге асыруына мүмкіндік жасалған. Қазақстандық делегация орталықтың құрылымы, басқару жүйесі, ғылыми зертханаларының жұмысы, зерттеу жобаларын ұйымдастыру тетіктері және университеттер арасындағы ғылыми кооперация тәжірибесімен танысты.
Бұл тәжірибе Өзбекәлі Жәнібеков атындағы ОҚПУ базасында қазақстанда университеттер мен ғылыми ұйымдардың ғылыми әлеуетін біріктіретін заманауи ғылыми-зерттеу хабын құру идеясына негіз болмақ. Түркиялық әріптестердің тәжірибесін зерделеу барысында бірлескен зертханалар құру, халықаралық ғылыми жобаларға қатысу, докторанттарды даярлау және жас ғалымдардың ғылыми-зерттеу әлеуетін арттыру бағыттары бойынша өзара тәжірибе алмасу мәселелері де қарастырылды. Тараптар білім беру саласындағы серіктестікті ғылыми-зерттеу бағыттарымен сабақтастыра отырып, халықаралық деңгейдегі бірлескен жобаларды жүзеге асыруға ниетті екендерін білдірді.
