Түркістан облысы Сауран ауданында агроөнеркәсіп кешенін дамыту бағытындағы ірі инвестициялық жобалардың бірі – елімізде баламасы жоқ мал бордақылау кешенінің құрылысы қарқынды жүргізілуде. Ауқымды жоба ауданның әлеуметтік-экономикалық дамуына жаңа серпін беріп, ауыл шаруашылығы саласының өндірістік әлеуетін арттыруға және жергілікті экономиканың өзін-өзі қамтамасыз ету мүмкіндігін күшейтуге бағытталған.
Ауыл шаруашылығы Сауран ауданының экономикалық дамуында маңызды орын алады. Сондықтан саланы заманауи технологиялармен жаңғыртып, өндіріс көлемін арттыру және мал шаруашылығының тиімділігін көтеру – негізгі басымдықтардың бірі. Осы тұрғыдан алғанда, жаңа бордақылау кешенінің іске қосылуы ауданның агроөнеркәсіптік әлеуетін сапалы жаңа деңгейге көтеруге мүмкіндік береді.
Жобаның басты ерекшелігі – мал бордақылау үдерісін бір жерде жүйелі түрде ұйымдастырып, өндірістің заманауи талаптарына сай жүргізу. Бұл малды күтіп-баптау, азықтандыру, ветеринариялық бақылау және дайын өнімді өткізу кезеңдерін өзара байланыстыруға жағдай жасайды. Нәтижесінде өндірістің тиімділігі артып, нарыққа сапалы әрі тұрақты көлемде ет өнімін шығаруға мүмкіндік қалыптасады.
Түркістан облысының әкімі Нұралхан Көшеров Сауран ауданы Ескі Иқан ауылдық округінде орналасқан «Түркістан ет өнімдері» ЖШС жүзеге асырып жатқан мал бордақылау кешеніне арнайы барып, жобаның жүзеге асу барысымен танысты. Жоба бастамашысы кешеннің құрылыс кезеңдері, өндірістік қуаты және іске қосылғаннан кейінгі мүмкіндіктері жөнінде баяндады.
Өңір басшысы кешенді аралау барысында шаруалармен тілдесіп, олардың ұсыныс-пікірлерін тыңдады. Сондай-ақ ауыл шаруашылығын дамыту, мал шаруашылығы өнімдерінің көлемін арттыру, жаңа жұмыс орындарын ашу және өңірдің экспорттық әлеуетін күшейту бағытындағы жоспарлар мен мемлекет тарапынан көрсетілетін қолдау тетіктері туралы талқыланды. Нұралхан Көшеров жобаның сапалы әрі белгіленген мерзімде аяқталуының маңыздылығын атап өтіп, жауапты тұлғаларға нақты тапсырмалар берді.
40 гектар аумақта орналасқан кешенді жобаның жалпы құны 1,3 млрд теңгені құрайды. Бірегей кешенде 5 мың бас ірі қара малға арналған бордақылау алаңы және тәулігіне 120 бас ірі қара мал союға арналған өндірістік алаң қарастырылған. Сонымен қатар малшыларға арналған тұрғын үйлер, Әкімшілік-іскерлік орталығы мен қосымша инфрақұрылым нысандары салынуда. Қазіргі таңда әкімшілік ғимаратының құрылысы 80 пайызға аяқталып, мал бордақылау алаңдары мен мал сою бекетінің құрылыс-монтаж жұмыстары жүргізілуде. Нысан инфрақұрылыммен толық қамтамасыз етілген.
Сонымен қатар кешен маңында «Муталиб агро» ауыл шаруашылығы өндірістік кооперативінің 30 шағын мал бордақылау алаңының құрылысы жүргізіліп жатыр. Аталған жобаларды «Ауыл аманаты» бағдарламасы аясында қаржыландыру көзделген. Жоба толық іске қосылғанда 120 тұрақты жұмыс орнын ашу жоспарланып отыр.
Бұл жобаның басты ерекшелігі – мал бордақылау алаңдарының бір жерде шоғырлануы. Мұндай тәсіл инфрақұрылымды тиімді пайдалануға, шығындарды азайтуға және жұмысты жүйелі ұйымдастыруға мүмкіндік береді. Аталған кешен іске қосылғаннан кейін мал бордақылау ісін заманауи технологиялар негізінде дамытуға, ет өндірісін ұлғайтуға және өңірдің агроөнеркәсіп саласының бәсекеге қабілеттілігін арттыруға елеулі үлес қоспақ.
Жобаның әлеуметтік маңызымен қатар, экономикалық әсері де жоғары. Өндіріс көлемінің артуы жергілікті бюджетке түсетін салықтық түсімдердің көбеюіне ықпал етеді. Сонымен бірге кешеннің айналасында жем-шөп өндіру, тасымалдау, ветеринариялық қызмет көрсету, техника жөндеу және басқа да қосалқы бағыттар дамиды. Осылайша бір ірі кәсіпорынның жұмысы шағын және орта бизнестің жаңа мүмкіндіктерін қалыптастырады.
Мал бордақылау кешенінің іске қосылуы ауданның экономикалық өзін-өзі қамтамасыз ету әлеуетін арттыруға да ықпал етеді. Жергілікті жерде ет өндіру көлемінің өсуі халықтың азық-түлікке деген сұранысын ішкі өндіріс есебінен өтеуге мүмкіндік береді. Бұл сырттан жеткізілетін өнімге тәуелділікті төмендетіп, азық-түлік қауіпсіздігін қамтамасыз етуге өз үлесін қосады.
Сонымен қатар жоба ауыл шаруашылығындағы өндірістік тізбекті қалыптастыруға мүмкіндік береді. Мал өсірумен айналысатын шаруашылықтар үшін тұрақты өткізу нарығы пайда болса, бордақылау кешені сапалы мал басымен қамтамасыз етіледі. Ал жем-шөп өндірушілер үшін тұрақты сұраныс қалыптасады. Осы өзара байланыс ауыл шаруашылығы саласындағы кооперацияны күшейтіп, жергілікті кәсіпкерлердің экономикалық белсенділігін арттырады.
