Жиында ауданның экономикалық көрсеткіштерін тұрақты өсіру, жоспарлы индикаторлардың орындалуын қамтамасыз ету және экономикалық әлеуетті тиімді пайдалану мәселелеріне ерекше назар аударылды. Әлеуметтік-экономикалық даму рейтингісі – ауданның нақты экономикалық жағдайын бағалап қана қоймай, әлсіз және басым бағыттарды айқындауға мүмкіндік беретін маңызды көрсеткіштердің бірі.
Сауран ауданында экономиканың тұрақты дамуын қамтамасыз ету үшін өндіріс көлемін ұлғайту, ауыл шаруашылығының тиімділігін арттыру, шағын және орта кәсіпкерлікті қолдау, жаңа инвестициялық жобаларды іске асыру және қызмет көрсету саласын кеңейту бағыттары қатар жүзеге асырылуы қажет.
Бұл ретте экономикалық өсімнің негізгі нәтижесі халықтың әл-ауқатын арттырумен өлшенеді. Жаңа кәсіпорындардың ашылуы, өндіріс көлемінің өсуі және кәсіпкерлік белсенділіктің артуы жаңа жұмыс орындарын қалыптастырып, тұрғындардың тұрақты табыс көздерін көбейтуге мүмкіндік береді. Ал халық табысының өсуі аудан ішіндегі тауарлар мен қызметтерге сұранысты арттырып, экономикалық айналымды жандандырады.
Мәжілісте қаралған салықтық түсімдер мәселесі де ауданның экономикалық тұрақтылығымен тікелей байланысты. Жергілікті бюджет кірісінің ұлғаюы әлеуметтік және инфрақұрылымдық жобаларды іске асыруға мүмкіндік береді. Сондықтан салықтық базаны кеңейту, кәсіпкерлік субъектілерінің қызметін заңдастыру және бюджет алдындағы міндеттемелердің орындалуын қамтамасыз ету – ауданның қаржылық тұрақтылығын нығайтудың маңызды тетігі.
Ауданның әлеуметтік-экономикалық дамуын қамтамасыз етуде ауылдық округ әкімдерінің жұмысы да маңызды. Әрбір елді мекеннің экономикалық мүмкіндігін анықтап, оның жер, еңбек және өндірістік ресурстарын тиімді пайдалану қажет. Бір ауылда ауыл шаруашылығы мен қайта өңдеу басым бағыт болса, екінші елді мекенде қызмет көрсету, сауда немесе шағын өндіріс үшін мүмкіндік болуы мүмкін.
Осы әлеуетті нақты жобаларға айналдыру аудан экономикасының жалпы көрсеткіштерін жақсартуға мүмкіндік береді. Бұл ретте инвестиция тарту, кәсіпкерлерге қолайлы жағдай жасау және жаңа бизнес бастамаларды сүйемелдеу жұмыстары жүйелі түрде жүргізілуі тиіс.
Бүгінде Сауран ауданының негізгі әлеуметтік-экономикалық даму көрсеткіштерінде оң өсім байқалады. Жалпы өңірлік өнім көлемі 2026 жылдың 6 айында 38,4 млрд теңгені құрап, өткен жылғы кезеңмен салыстырғанда 36,7 пайызға өсті. Өнеркәсіп өнім көлемі 14,3 млрд теңгеге жетіп, өткен жылғы кезеңмен салыстырғанда 19,9 пайызға артты. Оның ішінде, өңдеу өнеркәсібі өнімінің көлемі 12,3 млрд. теңгені құрап, 35,4 пайызға өсті. Негізгі капиталға бағытталған инвестиция көлемі 57,2 млрд теңгені құрап, өткен жылғы кезеңмен салыстырғанда 2,2 есеге артты. Сауда көлемі 1,9 млрд теңгені құраса, өсім 31,8 пайызға жетті. Өзіндік кірістер 3,3 млрд теңгені құрап, 14,5 пайызға ұлғайды. Салықтық түсімдер 3,1 млрд теңгені құрап, 36,7 пайызға артты. Бұл жетістіктер – ең алдымен, аудан тұрғындарының бірлігі мен ынтымағының, сондай-ақ мемлекеттік бағдарламалардың жүйелі жүзеге асырылуының нақты нәтижесі. Сауран ауданы 2025 жылдың қорытындысы бойынша облыста әлеуметтік-экономикалық даму көрсеткіштері негізінде І орынға ие болды. 2026 жылдың І жартыжылдығының қорытындысымен де көшбасшылық орнын сақтап, тағы да І орыннан көрінді. Бұл – ауданның тұрақты дамуының, экономикасының қарқынды өсіп келе жатқанының және барлық салада жүйелі жұмыстардың жүргізіліп отырғанының айқын дәлелі.
Сонымен қатар, 2026 жылдың 6 айында аудандағы өндірістік алаңдарда жалпы құны 23 млрд теңгені құрайтын 34 жоба іске қосылып, 894 адам жұмыспен қамтылды. Ауданда өткен жылы 2 мектеп, 1 оңалту орталығы пайдалануға берілді. Ауыл шаруашылығы саласы бойынша 5 мың басқа арналған мал бордақылау алаңы іске қосылды. Сонымен қатар 150 орындық Мәдениет үйі мен кітапхана, 1 спорт кешені пайдалануға берілсе, 1 спорт кешенінің құрылысын жыл соңына дейін аяқтау жоспарлануда.
