Түркістан облысында «Әділет» партиясының облыстық филиалының кезектен тыс ІІІ конференциясы өтті. Жиын барысында облыстық филиал төрағасын сайлау және Саяси кеңес құрамына өзгерістер енгізу мәселелері қаралды. Конференция делегаттарының дауыс беру нәтижесінде облыстық филиал төрағасы болып Алмас Сәлімов сайланды.
Іс-шараға «Әділет» партиясы төрағасының орынбасары Ержан Жылқыбаев бейне байланыс арқылы қосылды. Сондай-ақ, облыстық мәслихат төрағасы, облыстық партия филиалы Саяси кеңесінің мүшелері, өңірлік партия филиалының басшылары, бастауыш партия ұйымдарының жетекшілері, «Жастар рухы» Жастар қанатының белсенділері қатысты.
Алмас Сәлімовтің заң және кеден салаларында тәжірибесі мол. Бұған қоса, бизнес саласында, соның ішінде құрылыс компанияларында кеңесшілік және басшылық қызметтер атқарған. Мәслихат депутаты ретінде де қоғамдық-саяси қызметтерге белсене араласты.
«Әділет» партиясы төрағасының орынбасары Ержан Жылқыбаев жаңа басшыға жүктелетін міндеттерге тоқтала отырып, еліміз үшін Түркістан облысының маңызы зор екенін атап өтті. Оның айтуынша, бұл – еліміздегі халық саны көп, ауыл шаруашылығы дамыған және өңірлерде экономикалық әлеуеті жоғары аймақтың бірі. Сондықтан өңірдегі партия жұмысына жүктелетін жауапкершілік айрықша.
Ержан Жылқыбаев партияның сайлауалды бағдарламасында өңірлерді дамытуға, ауылдардың әлеуетін арттыруға, сондай-ақ білім беру мен денсаулық сақтау салаларының сапасын көтеруге басымдық берілгенін де сөз етті. Халықтың күнделікті өміріне тікелей әсер ететін мәселелер партия жұмысының негізгі бағыттары ретінде белгіленген.
Сонымен қатар адам капиталының маңызына да тоқталды. Ол білімді, бәсекеге қабілетті әрі еңбекқор ұрпақ тәрбиелеу маңызды екенін алға тартты. Бұл ретте Түркістан облысының мүмкіндігімен қатар, жауапкершілігі де жоғары екенін жеткізді.
Айта кетейік, «Әділет» партиясының Түркістан облыстық филиалы құрылымы жағынан республикадағы ең ірі ұйым. Облыстағы партия мүшелерінің саны 105 мың адамнан асады. Өңірде 17 аумақтық филиал мен 242 бастауыш партия ұйымы тұрақты жұмыс жүргізіп келеді.
