Сауран ауданының Бабайқорған ауылдық округінде «Ауылды дамыту командасы» пилоттық жобасы жүзеге асырылады. Бастама тұрғындардың табысын арттыруға, жұмыспен қамтуға және жеке қосалқы шаруашылықтардың мүмкіндіктерін кеңейтуге бағытталған.
Қазақстан Республикасы Ұлттық экономика министрлігі Өңірлік даму департаментінің директоры Нұрлан Мақсұтов жұмыс сапарымен Сауран ауданына барды. Сапар барысында аудан әкімі Мақсат Таңғатаров оған пилоттық жобаны іске асыру аясында жоспарланған жұмыстарды таныстырды.
Жоба Қазақстан Республикасы Премьер-Министрінің орынбасары Қанат Бозымбаевтың тапсырмасына сәйкес қолға алынған. Тапсырмаға сай, Ұлттық экономика министрлігіне Жамбыл және Түркістан облыстарының әкімдіктерімен бірлесіп, «Ауылды дамыту командасы» тетігін пилоттық режимде енгізу міндеті жүктелген.
Сауран ауданындағы пилоттық алаң ретінде Бабайқорған ауылдық округі таңдалған. Оның құрамына Бабайқорған, Абай, Үлгілі және Құмайлықас елді мекендері кіреді. Мұнда жалпы саны 6 920 тұрғын тұрады, 960 жеке қосалқы шаруашылық бар.
Жобаның негізгі тетігі – әр отбасының әлеуметтік жағдайы мен табыс көздерін зерделеп, қажеттілігіне қарай жеке қолдау жоспарын әзірлеу. Бұл ретте тұрғындарды жұмыспен қамту, кәсіптік оқыту, кәсіп ашуға жәрдемдесу және мемлекеттік қолдау шараларына қатыстыру көзделген.
Осы мақсатта жұмыспен қамту, қаржы, құқық, ауыл шаруашылығы және жастармен жұмыс бағыттары бойынша мамандарды біріктіретін команда құру ұсынылған. Мамандар тұрғындарға құжат рәсімдеуден бастап, бизнес-жоспар әзірлеу мен жобаны іске асыруға дейін қолдау көрсетеді. Сондай-ақ отбасылармен тікелей жұмыс жүргізіліп, көрсетілген көмектің нәтижесі тұрақты бақылауда болады.
Жобаның басым бағыттарының бірі – D және E санатындағы азаматтарды «Ауыл аманаты» жобасына тарту. Осыған байланысты Бабайқорған ауылдық округіндегі ет бағытындағы «Бауыржан» ауыл шаруашылығы өндірістік кооперативі арқылы жеке қосалқы шаруашылықтардың өнім өткізу мүмкіндігін кеңейту жоспарланып отыр.
Атап айтқанда, 289 жеке қосалқы шаруашылықтың өнімін кооперативке өткізуін ұйымдастыру және бес адамды жұмыспен қамту көзделген. Бұл жергілікті өндірушілердің өнім өткізу арнасын кеңейтіп, ауыл тұрғындарының табысын арттыруға мүмкіндік бермек.
Жалпы, «Ауылды дамыту командасы» пилоттық жобасы мемлекеттік қолдау шараларын өзара үйлестіруге, тұрғындардың нақты қажеттіліктеріне сай көмек көрсетуге және ауылдағы кәсіпкерлік әлеуетті дамытуға бағытталған. Бабайқорған ауылдық округінде жинақталған тәжірибе жобаны іске асырудың тиімді тетіктерін айқындауға негіз болмақ.
