Түркістан облыстық қоғамдық даму басқармасының басшысы Жанар Бектаева этномәдени бірлестіктер мен қоғамдық құрылымдардың жетекшілерімен кездесіп, өңірдегі қоғамдық келісім мен жалпыұлттық бірлікті нығайту мәселелерін талқылады.
Кездесу «Достық үйінде» өтті. Жиынды облыстық «Қоғамдық келісім» КММ басшысы Эльмира Жанғазиева жүргізді.
Басқосуда Жанар Бектаева Түркістан облысының ішкі саясаты мен қоғамдық құндылықтарын дамыту тұжырымдамасын таныстырып, алдағы кезеңге арналған жұмыс жоспарымен бөлісті. Сондай-ақ этномәдени бірлестіктер мен қоғамдық құрылымдардың өзара ынтымақтастығын арттырудың маңызын атап өтті.
Жиында облыстық ғылыми-сарапшылық топтың жетекшісі Сейдулла Садықов, Аналар кеңесінің төрайымы Гүлсара Тоққұлова, өзбек этномәдени бірлестігі Ақсақалдар кеңесінің төрағасы Зуппархан Чалданов, түрік этномәдени бірлестігі төрағасының орынбасары Хасан Мохаммед және Журналистер мен блогерлер клубының төрағасы Ерсұлтан Әмірбек, облыстық Медиация кеңесінің төрағасы Бақытжан Бейсембаев және облыстық Ақсақалдар кеңесі төрағасының орынбасары Ғани Рысбеков өз ұсыныстары мен пікірлерін білдірді.
Қатысушылар этносаралық келісімді нығайту, қоғамдық құрылымдардың жұмысын жандандыру, ұлттық құндылықтарды дәріптеу және бірлескен жобаларды жүзеге асыру мәселелерін талқылады.
Кездесу соңында Жанар Бектаева «Достық үйін» аралап, этномәдени бірлестіктердің кабинеттерімен және қоғамдық құрылымдардың жұмысымен танысты. Сонымен қатар олардың қызметіне қатысты ұсыныстар мен алдағы жоспарлар жөнінде пікір алмасты.
Бүгінгі таңда өңірде 18 этномәдени бірлестік пен 7 қоғамдық құрылымның жұмысы үйлестіріледі. Биылғы тоғыз айда 1236 іс-шара ұйымдастырылып, оған 100 мыңға жуық адам қатысқан. Осы кезеңде қазақ және орыс тілдерінде 3 мыңнан астам ақпараттық материал жарияланып, 200-ден астам бейнеролик дайындалған. Бұл жұмыстар қоғамдық келісім мен этносаралық татулықты нығайтуға бағытталған.
