Түркістан: Сайрамда жаңа бу-газ электр станциясының құрылысы жүргізілуде

Түркістан облысының Сайрам ауданында қуаттылығы 1 000 МВт болатын бу-газ электр станциясының құрылысы жүргізілуде. станцияның іске қосылуы Түркістан облысының экономикалық дамуына елеулі ықпал етПЕК. Ең алдымен, өңірдің энергетикалық қуаты артып, өндірістік кәсіпорындарды тұрақты электр энергиясымен қамтамасыз етуге мүмкіндік кеңейеді. Бұл жаңа өндіріс орындарын ашуға, өнеркәсіптік жобаларды жүзеге асыруға және инвестициялық тартымдылықты арттыруға негіз болады.Өңірдің энергетикалық әлеуетін арттыруға бағытталған стратегиялық жобаның іске асырылу барысы облыс әкімінің орынбасары Еркебұлан Дауылбаевтың төрағалығымен өткен жұмыс кеңесінде талқыланды.

Жиын барысында құрылыс-монтаж жұмыстарының қазіргі жағдайы, өндірістік жұмыс кестесінің орындалуы және алдағы кезеңдерге арналған жоспарлар қаралды. Сонымен қатар жобаның негізгі кезеңдері, құрылыс барысындағы өзекті мәселелер мен оларды шешу жолдары жан-жақты пысықталды.

Еркебұлан Дауылбаев аталған жобаның өңірдің энергетикалық тұрақтылығын қамтамасыз етудегі маңызына тоқталып, құрылыс жұмыстарының белгіленген мерзімде әрі сапалы орындалуы қажеттігін атап өтті. Сондай-ақ туындаған мәселелерді созбалаңға салмай, жауапты мекемелермен бірлесіп шешу жөнінде тапсырмалар берді.

Кеңес барысында жобаның жүзеге асуына ықпал етуі мүмкін тәуекелдер де назардан тыс қалмады. Атап айтқанда, жауапты ұйымдар арасындағы өзара байланысты күшейту, ұйымдастырушылық мәселелерді үйлестіру, құрылыс алаңындағы жұмыстардың үздіксіздігін қамтамасыз ету және жергілікті атқарушы органдар тарапынан қажетті қолдау көрсету мәселелері қарастырылды.

Жиын қорытындысы бойынша жобаны іске асыруға қатысушы ұйымдар мен жергілікті атқарушы органдар арасындағы үйлесімді жұмысты жалғастыру қажеттігі айтылды. Әрбір бағыт бойынша жауапты мекемелердің міндеттері нақтыланып, құрылыс барысын тұрақты бақылауда ұстау мәселесіне басымдық берілді.

Жалпы, қуаттылығы 1 000 МВт бу-газ электр станциясының құрылысы Түркістан облысының энергетикалық инфрақұрылымын дамытудағы маңызды жобалардың бірі саналады. Оның іске қосылуы өңірдегі электр энергиясына деген сұранысты өтеуге, энергетикалық жүйенің тұрақтылығын нығайтуға және электр қуаты тапшылығының алдын алуға ықпал етуі мүмкін.

Сонымен қатар мұндай ауқымды инвестициялық жобалар өңірдің әлеуметтік-экономикалық дамуына да серпін береді. Құрылыс кезеңінде түрлі сала мамандарына сұраныс артып, жаңа жұмыс орындары ашылады. Ал станция пайдалануға берілгеннен кейін энергетика саласында тұрақты еңбекпен қамту мүмкіндіктері қалыптасады. Бұдан бөлек, сенімді энергиямен жабдықтау өнеркәсіптік кәсіпорындардың дамуына, жаңа өндірістерді іске қосуға және инвестиция тартуға қолайлы жағдай жасайды.

Осылайша, бу-газ электр станциясының құрылысы Түркістан облысының өндірістік әлеуетін арттырумен қатар, ұзақ мерзімді экономикалық өсімге қажетті энергетикалық негіз қалыптастыруға бағытталған.