
Түркістан облысының спортшылары республикалық және халықаралық жарыстардағы көрсеткіштерді жақсарып, жоғары жетістіктерге қол жеткізуде. Осы жетістіктердің қатарында Түркістан облыстық Жоғары спорт шеберлігі мектебінің нәтижелері ерекше аталды. Аталған спорт мекемесі 2026 жылы жоғары көрсеткіштерге қол жеткізіп, өңір спортының дамуына елеулі үлес қосты. Жыл қорытындысы бойынша мектеп тәрбиеленушілері халықаралық және республикалық жарыстарда жалпы 361 медаль жеңіп алды. Оның ішінде 138-і алтын, 93-і күміс және 130-ы қола жүлде болды.
Мектеп директоры, Қазақстан Республикасының еңбек сіңірген спортшысы Шынболат Райхановтың басшылығымен спортшылардың кәсіби дайындығын жетілдіру, олардың жарыстарға қатысу мүмкіндіктерін кеңейту және халықаралық бәсекеге қабілеттілігін арттыру бағытында жүйелі жұмыстар жүргізілді. Нәтижесінде ұлттық құрама сапындағы мектеп спортшыларының саны 65-тен 123-ке дейін өсті. Бұл өңірде спорт резервін даярлау жұмыстарының нәтижелі жүргізілгенін көрсетті.
Биылғы жылдың маңызды жетістіктерінің бірі – ХХ жазғы Азия ойындарындағы жоғары көрсеткіш болды. Байрақты додаға мектептің 14 спортшысы қатысып, 1 алтын, 2 күміс және 3 қола медаль иеленді. Әсіресе, академиялық есуден Владислав Яковлев Азия ойындарының чемпионы атанып, өңір спорты тарихындағы айтулы жетістіктердің біріне қол жеткізді.
Сондай-ақ дзюдодан Айдар Арапов күміс жүлдеге ие болды. Байдарка және каноэде есуден Ольга Шмелева күміс және қола медаль жеңіп алып, жоғары шеберлігін көрсетті. Әйелдер күресінен Нулифар Раймова мен еркін күрестен Едіге Қасымбек Азия ойындарының қола жүлдегерлері атанды. Бұл нәтижелер Түркістан облысында олимпиадалық спорт түрлерін дамыту бағытындағы жұмыстардың тиімділігін аңғартты.
Әлемдік деңгейдегі жарыстарда да мектеп спортшылары табысты өнер көрсетті. Әлем чемпионаттарында жалпы 4 медаль қоржынға түсті. Оның ішінде 1 алтын, 1 күміс және 2 қола жүлде бар. Алтын медальді жас балуан Бағдәулет Ағабек жеңіп алып, халықаралық аренада жоғары нәтиже көрсетті.
Бұдан бөлек, Азия чемпионаттарында 16, Азия кубоктарында 18, әлем кубогында 1 медаль иеленді. Қазақстан чемпионаттарында 173 жүлде, ел кубогында 90 медаль және халықаралық турнирлерде 53 жүлде жеңіп алынды. Осылайша, мектеп спортшылары әртүрлі деңгейдегі жарыстарда тұрақты нәтиже көрсетіп, өңірдің спорттық әлеуетін танытты.
Мектептің жалпы медаль көрсеткішінің 188-ден 361-ге дейін өсуі де назар аударарлық жетістік болды. Бұл көрсеткіш спортшылардың дайындық деңгейінің жақсарғанын, жаттығу үдерісінің жүйеленгенін және жарыстарға қатысу ауқымының кеңейгенін көрсетті. Сонымен қатар ұлттық құрамадағы спортшылар санының 123-ке жетуі облыста кәсіби спорт резервінің қалыптасып келе жатқанын аңғартты.
Қазіргі таңда Жоғары спорт шеберлігі мектебінде спорттың бірнеше басым бағыты бойынша кәсіби мамандар даярланды. Атап айтқанда, дзюдо, таеквондо, грек-рим және еркін күрес, әйелдер күресі, садақ ату, теннис, ауыр атлетика, академиялық есу, байдарка және каноэде есу, желкенді қайық пен жүзу спорт түрлері бойынша жаттығулар ұйымдастырылды.
Әр спорт бағыты бойынша жас спортшылардың физикалық және техникалық дайындығын жетілдіруге, жарыс тәжірибесін қалыптастыруға және халықаралық талаптарға сай шеберлігін арттыруға көңіл бөлінді. Тәжірибелі жаттықтырушылардың жұмысы мен спортшыларға жасалған қолдау жоғары нәтижелерге қол жеткізудің маңызды факторына айналды.
Жалпы, Түркістан облысында спорт саласының дамуы әлеуметтік саясаттың маңызды бағыттарының бірі ретінде қарастырылды. Өңірде жаңа спорт кешендерінің бой көтеруі, қолданыстағы нысандардың жаңартылуы, балалар мен жасөспірімдер спортына қолдау көрсетілуі тұрғындардың спортпен тұрақты айналысуына мүмкіндік берді. Бұқаралық спортты дамыту арқылы салауатты өмір салтын қалыптастыруға және жастардың бос уақытын тиімді ұйымдастыруға жағдай жасалды.
Спорт саласына салынған инвестиция өңірдің әлеуметтік-экономикалық дамуына да оң ықпал етті. Жаңа нысандардың салынуы құрылыс саласының жандануына, жаттықтырушы және қызмет көрсетуші мамандарға сұраныстың артуына, спорттық қызметтер нарығының кеңеюіне мүмкіндік берді. Сонымен қатар облыста республикалық және халықаралық жарыстар өткізу спорттық туризмді дамытуға, қонақүй, қоғамдық тамақтану және көлік қызметтеріне сұранысты арттыруға негіз болды.
Жоғары спорт шеберлігі мектебінің жетістіктері Түркістан облысында кәсіби спортты дамытуға бағытталған жұмыстардың нақты нәтижесін көрсетті. 361 медаль – спортшылардың табанды еңбегі мен бапкерлердің кәсіби шеберлігінің, сондай-ақ спорт саласына көрсетілген қолдаудың жемісі.
Алдағы кезеңде де спортшылардың халықаралық жарыстардағы бәсекеге қабілеттілігін арттыру, ұлттық құрамаға лайықты резерв даярлау және спорттық инфрақұрылымды одан әрі жетілдіру өңірдің басым міндеттерінің бірі болып қала бермек. Бұл жұмыстар Түркістан облысының спорттық әлеуетін нығайтып, Қазақстан спортының халықаралық аренадағы абыройын асқақтатуға қызмет етеді.
