АҚТАС БҰЛАҒЫ ТУРИСТІК МЕКЕНГЕ АЙНАЛҒАН

998

Түркістан облысында киелі, қасиетті мекендер көп. Олардың бірін білсек, бірін білмейміз. Бұл жолғы сапарымыз – талай дертке дауа болған Ақтас әулие минералды табиғи бұлағы. Ол туралы не білеміз?

Жұрт әулие бұлақ деп атайды. Киелі мекен Созақ пен Бəйдібек ауданы шекарасында. Шолаққорғанға кіреберісте солға қарай бұрыласыз. Одан ары 18 шақырым жер. Көзтартар жоталарды тамашалап, тау-тасы көп осы қашықтықты көлікпен 1 сағаттан аса уақытта жүріп өттік. Мүлгіген тыныштық. Нағыз дархан дала. Ұялы телефон да байланыс аясынан тыс жерде.

Кереметі сол, ауа таза. Табиғаттың тамашасы деген осындай-ақ болар. Келіп жатқан жас та, жасамыс та көп. Ел аузындағы әңгімелерге қарағанда, ертеректе осы маңайда өмір сүрген бір дәулетті кісі төрт түлігін осы бұлақтың суынан кешіп алып өткенде, мал-жануардың қышыма, қотыр аурулары лезде ғайып болыпты. Содан бері бұл жер киелі саналады екен. Бұл да Жаратқанның кереметі ғой.

Бұл киелі жерге көп адамдар дертіне дауа іздеп келеді. Бұлақтың суының емдік қасиетін көрген кісілер апталап жатып түнейді. Бұлақ суы қысы-жазы тынымсыз ағады екен. Суының температурасы – +18 градус. Сондағы ем қабылдаушылардың сөзіне сенсек, қазір ақтаңдақ ауруының емі табылмай жатқан көрінеді. Бұл жер осы ауруға бірден-бір ем. Талай дәрі-майлар, емші-тәуіптер кетіре алмаған сол ақтаңдақ жара осы суға түсіп шыққаннан кейін кәдімгідей кетіп қалады дейді көпшілік.

Онда суы шипалы үш бұлақ бар – ана бұлақ, ата бұлақ, бала бұлақ. Сырқаты мазалаған ағайын осы бұлақтарға түсіп (ерлер 30 мин, әйелдер 15 мин) жатады, емдеу мерзімі ауруы жазылғанша. Осы бұлақта емделіп кейіннен аурудың ізі де қалмаған адамдар көп.

Жарнама жасағанымыз емес. Сондағы азаматтардың айтуынша, онда денесін жара басқан, асқазанында жарасы бар талай адам осы қасиетті бұлақтан шипа тапқанын айтып жатыр. Бұл суға түскен адамның денесіндегі жара қандай болса да аз уақытта кетіп қалады. Сапарымызда еліміздің бірнеше аймағынан келген ем қабылдаушыларды кезіктірдік. Қарағандыдан, Алматыдан және Оңтүстіктің әр аймағынан келген тұрғындар бар. Сенесіз бе, сенбейсіз бе, қасиеті мол бұлақтың кереметін көруге Израильден, Испаниядан келіп жатқандар бар екен.

Бұлаққа иммунитетін көтеру үшін де келетіндердің қатары көп. Бұл жерде адамдар мамыр айынан қыркүйектің соңына дейін ем қабылдайды. Демалушылардың қауіпсіздігі қамтамасыз етілген.

Жергілікті кәсіпкер азамат келушілерге арнап, арнайы демалыс үйін тұрғызыпты. Жаңадан салынған тұрғынжайдың бір бөлмелік құны – тәулігіне 5 мың теңге. Арнайы киіз үйлер мен вагондарға да (1000-3500 теңге аралығы) түнеуге болады. Ал демалыс аймағына кіру құны әр адамға – 200 теңге. Суды бір адам 70 литрге дейін алып кетуге болады. Арнайы асхана, мешіт бар. Бір азаматтар осы киелі жердің суын тасымалдап, арнайы құтыларға құйып, қаладағы дүкендерге саудалап сатқан екен. Сонда бұлақтың бастауы бітеліп, су шықпай қалыпты. Су сатуды тоқтатқанда ғана бұлақ көзі қайта ашылған көрінеді. Бұл бұлақты көптеген ғалымдар зерттеп көрген екен. Бұлақ тері ауруларының көптеген түрлеріне ем (псориаз, экзема, ветилиго, зоб, аллергия). Бұлақ суының химиялық құрамы арнайы тексеріліп, шипалы деп табылыпты. Оның құрамында калций, нитраттар азоты, амиак, сынап, сулфат, хром, фтор, қорғасын, темір, мыс, магнии бар.

«Ақтас әулие» бұлағының дертке дауа емдік қасиеті біреу болмаса, біреуге септігі тиер, ауруына ем болар, деген ниетпен көпшілікке жеткізгіміз келді.

Әділ Айтөре