Шымкентте ерте көктемнен бастап қала жастары шаһардың тазалық жұмыстарына белсенді атсалысып келеді. Бүгін «Жасыл ел» еңбек жасақтары «Ынтымақ-2» шағынауданында сенбілік өткізді. Тазалық шарасына 200-ге жуық жас қатысып, шашылған қатты қалдықтарды теріп, қоқыстарды жүк көліктеріне тиеді.
– «Жасыл ел» бағдарламасы аясында биыл 1200 жас жұмыспен қамтылды. Абай, Әл-Фараби, Еңбекші, Қаратау әкімдіктерімен бірлесіп 10 сенбілік өткіздік. Әр тазалау кезінде 400-500 қап қоқыс жиналады. Жұмысқа ынталы жастардың жылдан жылға қатары артып келеді, – деді «Жасыл ел» жобасының үйлестірушісі Абай Андабаев.
Жастар осыған дейін Қаратау, Еңбекші аудандарында болып, тазалық жұмыстарын атқарған. Еңбек жасағына жұмылдырылған 16-29 жас аралығындағы жоғары және орта арнаулы оқу орындарының студенттері мен белсенді жастар қосылған. Оларға 42500 теңгеден жалақы төленеді.
Тамыз айында қаламыздың тазалық шараларында белсенділік танытқан қыз-жігіттер арнайы марапатталып, сыйлықтар табысталады. Еске сала кетсек, мегаполисте жастардың үлесі жалпы халық санының 22,2%-ын құрайды. Яғни үшінші мегаполисте 239 443 жас бар.
