Алматы қаласы мен Түркістан облысының әкімдіктері ерте піскен жылыжай қырыққабатын тікелей жеткізу жөнінде өзара ынтымақтастық меморандумына қол қойды.
Көшпелі кеңес барысында тараптар Түркістан облысының Сарыағаш, Келес және Сайрам аудандарындағы шаруашылық қожалықтарды барып көрді. Қол жеткен келіссөз шеңберінде 15 сәуірден бастап 15 мамырға дейін Алматының сауда желілеріне тікелей шаруашылық алқаптарынан келісін 140 теңгеден 550 тонна («Магнум» сауда желісіне – 300 тонна, «Смолл» сауда желісіне – 200 тонна, «Тоймарт» сауда желісіне – 50 тонна) қырыққабат жеткізіледі.
Бұл ретте сөредегі бөлшек сауда бағасы бір келі – шамамен 185 теңге. Сондай-ақ, меморандумға сәйкес, маусым айынан бастап егіс алқабында өсірілген қырыққабаттың шамамен 2 мың тоннасы үздіксіз жеткізіледі.
«Қабылданған шаралар қырыққабаттың бағасын ұстап тұруға, әлеуметтік маңызы бар өнімге бағаның негізсіз өсуіне жол бермеуге мүмкіндік береді», – деп хабарлады Алматы қаласы әкімдігінен.
