Мемлекет басшысы Қасым-Жомарт Кемелұлы Тоқаев «Әділетті Қазақстанның экономикалық. бағыты» Қазақстан халқына арнаған Жолдауында «AMANAT» партиясының «Қарызсыз қоғам» жобасын ерекше атап өткені белгілі. Жоба бойынша еліміздің 8 аймағында 20 мыңнан астам адам қаржылық сауатын арттырғанын атап өтіп, олардың көпшілігі – 10 және одан да көп несие алған адамдар екенін айтты. «Бұл жоба аз уақытта өзінің тиімділігін көрсетті. Үкіметке «AMANAT» партиясымен бірлесіп, оның ауқымын кеңейтуді тапсырамын. «Қарызсыз қоғам» жобасының игілігін бүкіл еліміз көруі қажет», – деді.
Бүгін «AMANAT» партиясының Орталық аппаратында ҚР Премьер-Министрінің орынбасары – қаржы министрі Ерұлан Кенжебекұлы Жамаубаевтың төрағалығымен «Қарызсыз қоғам» жобасын іске асыру мәселелеріне арналған жиын өтті. Мәжіліске аймақтық партия филиалдары бейнеконференц байланыс жүйесі арқылы қосылды. Партияның Түркістан облыстық филиалында өткен жиынға облыс әкімінің бірінші орынбасары Зұлфұхар Сансызбайұлы Жолдасов, партия филиалының төрағасы, облыстық мәслихат депутаты, партиялық фракция жетекшісі Алтынсары Дүйсенбекұлы Үмбетәлиев, партия филиалы атқарушы хатшысының орынбасарлары мен жауапты қызметкерлер, салалық басқармалар мен екінші деңгейлі банк өкілдері қатысты.
«AMANAT» партиясының бастамасымен жүзеге асып жатқан жоба шеңберінде 2023 жылы республикамыздың 8 өңірінде 65 мың тұрғын қаржылық сауаттылық курстарында оқып шыққанын партияның Атқарушы хатшысы Дәулет Жамаубайұлы Кәрібек мәлімдеді. «Қарызсыз қоғам» жобасын іске асыру бойынша 9 мемлекеттік органдармен және 11 екінші деңгейлі банк ұйымдарымен бірлескен өзара ынтымақтастық меморандумы қабылданды. Жобаның мақсат-міндетіне сай 25 тармақты қамтитын Жол картасы бекітіліп, оны іскеру бойынша жұмыстар атқарылуда. Ресми деректерге сүйенсек, 8 млн. 400 мыңнан астам адамның несиесі бар. Оның ішінде 1 млн. 700 мыңнан астам адам қарыздарын уақтылы төлей алмай отыр. Екі немесе одан да көп несиенің болуы қалыпты жағдайға айналған», – деп атап Дәулет Жамаубайұлы.
Партияның «Қарызсыз қоғам» жобасына қатысушылардың 75 пайызын әйел азаматтар құрағанын, оқу курсына қатысқандардың 58 пайызында төрт немесе одан да көп несие қарыздары болғанын мәлімдеді. Биыл жоба барлық өңірлерде іске асырылып, қаржылық сауаттылықты арттыру курстарында 750 мың адамды қамту жоспарланғанын жеткізді. Оның ішінде 200 мың адам ауыл тұрғындары болса, 100 мыңнан астамы – жоғары оқу орындарының студенттері, 450 мыңы – мектеп оқушылары мен колледж тәлімгерлері болмақ.
Жиынның күн тәртібіндегі мәселе бойынша «AMANAT» партиясының «Қарызсыз қоғам» жобасының үйлестіруші баяндама жасады. Жоба бойынша министрліктер мен ведомство өкілдерінің салалық жұмыстарының барысы, Парламент Мәжілісінің тұрғындарды шектен тыс несие қамытынан қорғаудың заң шығарушылық қызметі жөнінде хабарламалар тыңдалды.
Түркістан облысы әкімінің бірінші орынбасары Зұлфұхар Сансызбайұлы өңірде жобаны іске асыруда арнайы топ құрылып, оған облыс әкімінің орынбасары жауапты болып бекітілгенін атап өтті. Аймақтық деңгейде аудан, қала әкімінің орынбасарлары жауапты болып белгіленін айтты. Жобаны іске асыруда және ауқымын кеңейтуде Түркістан қаласында 3 ғимарат қарастырылғанын мәлімдеді. Аудан, қалаларда офиске кәсіпкерлерге қызмет көрсету ғимараттары белгіленіп, толықтай кеңсе техникаларымен және қажетті жиһаздармен жабдықталғанын жеткізді.
2024 жылы облысымызда жоспар бойынша 10500 адам қаржылық сауаттылықты арттыру курстарынан өтетінін жария етті. Өңірге бекітілген алты менеджер мен қаржы сарапшылары Сауран, Келес, Шардара, Мақтаарал, Жетісай, Сарыағаш аудандарының тұрғындарын оқытуды іске асыратынын мәлімдеді.
Атап өту керек, «AMANAT» партиясының Түркістан облыстық филиалы «Қарызсыз қоғам» жобасы шеңберінде 2023 жылы 12650 адамды қаржылық сауаттылықты арттыру курстарында оқытуы керек болса, жоспар 115,4 пайызға артығымен орындалып, нақты 14600 адам аталған курстарға қамтылып, қаржылық білімін арттырды.
«AMANAT» партиясы Түркістан облыстық филиалының баспасөз қызметі
