Шымкент қаласы Қаратау ауданының әкімі Абзал Әліқұлов мердігер мекеме өкілдерімен бірге «Нұрсәт» шағын ауданындағы №109-117 көп қабатты үйлер аулаларының абаттандыру және көгалдандыру жұмыстары барысымен танысты.
Кезекті аралау барысында аудан басшысы аталған аулада қазіргі таңда қазба жұмыстары жүргізіліп, суғару құбырлары орнатылып, жасыл желектерді суғару мақсатында арнайы тік ұңғыма қазылып жатқандығына куә болды.
Өз кезегінде Абзал Шымкентбайұлы жауапты мердігер мекемеге абаттандырылып жатқан аумаққа көгал алаң жасау жұмыстарының сапалы жүргізілуін талап етті. Одан бөлек, жасыл желектер мен ағаш көшеттерін отырғызу бойынша да жұмыстарды назарға алуды тапсырды.
Айта кетейік, биыл Қаратау ауданы аумағында абаттандыру және көгалдандыру жұмыстары қарқынды жүргізілді. Осы орайда Қаратау ауданы полиция қызметкерлері «Таза қала» профилактикалық іс-шарасы барысында Ақберген көшесі, №11 үйдің алдына құрылыс қалдықтары үйінділерін төгіп тастағанын анықтады. Бұл ретте абаттандыру қағидаларын бұзған жергілікті тұрғынға ҚР ӘҚБтҚ-нің 505-бабына сәйкес әкімшілік хаттама толтырылып, түсіндірме жұмыстары жүргізілді.
