Agritech саласы (агротехнология) Қазақстанда 2020 жылдан бастап кеңінен тарала бастады. Бүгінде Қазақстан фермерлеріне ауыл шаруашылығы алқаптарының жай-күйі туралы ақпаратты қосымшадан автоматты түрде алып отыру мүмкіндігі бар.
Egistic – ауыл шаруашылығын басқарудың отандық ERP жүйесі, телефон арқылы егістіктердің жай-күйін бақылауға көмектеседі. Құрылтайшы компанияның атауын қазақшалап «егін алқабы, егіс даласы» мағынасындағы егістік сөзімен байланыстырып қойған.
Сервис қосымшасында егістікпен айналысушылар өсімдік жапырақтарындағы ылғал мен азот мөлшері, дақылдардың пісетін уақыты, арамшөптердің немесе аурулардың пайда болуы сияқты маңызды әрі қажет ақпаратты ала алады және оны алдын алуға жақсы мүмкіндік туады. Сонымен қатар техниканың жұмысын және оның нақты уақыттағы қозғалысын бақылауға мүмкіндік бар, оған қоса әр егістікте дақылдар тарихын сақтауға, қоймалардағы қорларды қадағалауға оңай әрі ыңғайлы болады.
Шаруалар барлық ақпаратты аэроғарыштық суреттерден алады.
«Ғарыштық суретте инфрақызыл канал бар, ол жерден шағылысқан кезде фотосинтез процесінің тығыздығын көрсетеді. Бұл фермерлерге проблемалық аймақтарды анықтауға, егістік аналитикасын ретроспективада алуға және биылғы жылы қанша өнімге сенуге болатынын түсінуге мүмкіндік береді. Сонымен қатар сіз әртүрлі егістіктердегі егіс нәтижелерін салыстыра аласыз және осылай жақсы нәтижеге қандай технологиялар сізге жақсы әсер еткенін зерделей аласыз», деді Egistic фермерлер қолданбасының негізін қалаушы Жандос Керімқұлов.
Аталған технология үдерістерді едәуір жеңілдетуге және шешім қабылдауды тездетуге көмектеседі. Алқаптардың иесі кез-келген уақытта қосымшаға кіріп, техниканың қай жерде екенін, бір ауысымда қанша гектар өңделгенін көре алады. Қол еңбегі айтарлықтай босатылады, қара күшті басқа қажеттіліктерге бағыттауға болады. Мысалы, осындай қосымшаны пайдаланушылардың бірі 1 жыл ішінде шамамен 50 миллион теңге үнемдеген.
