Бүгін Арыс қалалық спорт кешенінде ересектер, жастар және жасөспірімдер арасындағы жауынгерлік аралас жекпе-жектен облыстық чемпионат өз мәресіне жетті. Сайыс Түркістан облысының спорт басқармасы мен «Arys Fight» аралас жекпе-жек клубы және қалалық ішкі саясат бөліміне қарасты «Жастар ресурстық орталығының» ұйымдастыруымен өткен.
Үш күнге созылған турнирде Түркістан облысы бойынша 10 ауданнан 300-ден астам спортшы өз бақтарын сынады. Спорттық шараға қала әкімінің орынбасары Алмаз Сұлтанов арнайы қатысып, алыс-жақыннан келген спортшыларға алғысын білдірді.
«Мұндай жарыстар біздің өңіріміздің дене шынықтыру және спорт саласының дамуына жаңа қарқын беріп келеді. Осындай спорт түрлерінің арқасында жастарымыз шыңдалып, салауатты ұрпағымыз көп болуына септігін тигізеді. Талай чемпионды түлеткен киелі Түркістан топырағынан әлі де Олимпиада, әлем чемпиондары шыға береді деп сенемін», – деді Алмаз Советұлы.
Кіл мықтылардың басын қосқан турнир тартысқа толы болды. Арыстық спортшылар намысты қолдан бермей қарсыластарын алып та жықты, шалып та жықты. Турнир қорытындысы бойынша 1-орынды төрт ауданның үздіктерінен құралған Түркістан облысының №5 спорт лайық деп танылды. Арыс қаласының спортшылары 2-орын, ал 3-орын Түркістан қаласының спортшыларына бұйырды. Жүлделі орын алғандарға, диплом, медаль және демеушілердің атынан ақшалай сыйлық берілді.
Дүбірлі додаға құрметті қонақ ретінде әскери самбодан 4 дүркін Әлем чемпионы, ережесіз жекпе-жек шебері Арман Оспанов, Бокстан әлем чемпионы, олимпиада жарқын өнер көрсеткен Біржан Жақыпов, жалаң қолды жекпе-жек шебері Бағдат Дүйсенбаев, Алматы қалалық бокс федерациясының президенті Ержан Космамбетов, ҚР Еңбек сіңірген Темірбек Диқанбаевтар арнайы шақырылып, жас спортшыларға сәттілік тіледі.
Спорт сүйер қауым бұл жарыста жарқырай көрінген жаңа есімдерге де куә болды. Олардың жетістігінің артында бапкерлерінің тынымсыз еңбегі, үздіксіз жаттығулардың тұрғаны белгілі. Жеңімпаз атанған, осы жарыста жүлделі болған жас жауынгерлерге алда тек қана жеңістер тілейміз!
