Түркістан облыстық мәслихатының 4 бірдей шақырылымының депутаты, қоғамдық кеңесті басқарған ел ағасы, Түркістан облысының, Шымкент қаласының «Құрметті азаматы» Өмірзақ Пердебекұлы Мелдеханов дүниеден озды.
Мелдеханов Өмірзақ Пердебекұлы, 1953 жылы 20-шы сәуірде Оңтүстік Қазақстан облысы Мақтаарал ауданы «Жаңа жол» («Новый путь») кеңшарындағы Киров атындағы бөлімшеде дүниеге келді, ұлты қазақ. 1970 жылы Ленин атындағы орта мектептің 10 сыныбын бітіріп, еңбек жолын 1970 жылдың маусымында Оңтүстік Қазақстан облысы Мақтаарал ауданының «Коммунизм» кеңшарында жұмысшы болып бастады.
1971 жылдың кыркүйегінде Қазақ химия-технология институтына оқуға түсіп, 1976 жылдың маусымында бітірді.
1977 жылы Қазақстан Компартиясы Шымкент обкомының Марксизм – Ленинизм университетіне түсіп, 1979 жылдың 29 маусымында партиялық білім жүйесі бойынша саяси жоғарғы білім алды.
Өндірістен қол үзбей, 1983-1989 жылдары Ташкент Мемлекеттік университетінде оқып, онда мұғалім-химик мамандығына ие болды, сондай-ақ АҚШ Тынық мұхиты жағалауының университетінде «Банк ісі және қаржы» мамандығы бойынша докторантураны тәмамдады. Сонымен қатар 2010 жылы Шымкент университетін бітіріп, «Заңгер» мамандығына ие болды.
Институтты бітірген соң, 5 жыл бойы «Чимкентстрой» тресінде жүк артушы, шебер, бөлім бастығы болып жұмыс істеді. «Семипалатинсктяжстрой» бірлестігінің «Жезкенттяжстрой» тресі басқарушысының орынбасары ретінде 1981 жылдың қыркүйегі мен 1984 жылдың ақпан айын қоса алғандағы уақыт аралығында еңбек етті. «Алматыпромснаб» басқармасында 1984 жылдың сәуірі мен 1986 жылдың тамызы аралығында басқарма бастығының орынбасары болып жұмыс істеді. 1986 жылдың кыркүйегі мен 1987 жылдың маусым аралығында Шымкенттегі ЖБИ-1 зауыты директорының орынбасары, 1987 жылдың маусымы мен 1989 жылдың қыркүйегі аралығында «Агропромстрой» әкімшілік-шаруашылық бөлімінің бастығы қызметтерін атқарды. 1989 жылдың қыркүйегінде «Шипагер» көпсалалы ғылыми-өндірістік фирмасын ұйымдастырып, оған басшылық етті.
1992 жылдың қазанынан «Қазфармбиопром» Қазақ Мемлекеттік концерні, 1994 жылы қайта құрылған «Фармбиопром» АҚ-да Бас директордың орынбасары, 1995 жылдың маусымы мен 1998 жылдың 15-ші мамыры аралығында оның Бас директоры болып еңбек етті. Сонымен қатар 1993 жылдың сәуірі мен 1996 жылдың ақпаны аралығында Шымкент химия-фармокологиялық зауытының директоры болып, сондай-ақ 1993 жылдың қазанынан 1997 жылдың қарашасына дейін «Касуб» жекеменшік банкінің Бақылау кеңесінің төрағасы міндетін атқарды. 1998 жылдың мамыры мен 2000 жылдың ақпаны аралығында Оңтүстік Қазақстан облыстық Қоршаған ортаны қорғау басқармасының бастығы болды. Оңтүстік Қазақстан облыстық әкімдігінің алқа мүшесі болды.
1995-1999 жылдары Оңтүстік Қазақстан облыстық Самбо мен Қазақша күрес федерациясының және Азия самбо федерациясының вице-президенті болды.
Халықаралық Ақпараттандыру академиясының корреспондент-мүшесі, банк және қаржы мәселесі бойынша доктор, 1994-1999 жылдар аралығында облыстық мәслихат депутаты, 2003-2007 жылдар аралығында және 2012 жылдан бастап облыстық мәслихаттың депутаты, мәслихаттың мемлекеттік – құқық мәселелері, азаматтардың құқықтары мен заңды мүдделерін қамтамасыз ету жөніндегі тұрақты комиссиясының төрағасы.
Басылып шыққан ғылыми еңбектер, мақалалар мен бірқатар кітаптар авторы.
2000 жылдың қазан айынан 2005 жылдың шілдесіне дейін «Южмаш», Бақылау Кеңесінің Төрағасы болып жұмыс істеді, 2005 жылдың шілдесінен «Пресс-Автомат» ЖШС-і, «Нұр» медиа-холдинг директорлар кеңесінің төрағасы, «Нұр Отан» ХДП Шымкент қалалық филиалының төрағасы.
2004 жылы « Нұр Отан» партиясы Абай ауданының, 2006-2018 жылдар аралығында «Нұр Отан» партиясы Шымкент қалалық филиалының төрағасы.
2005 ж. төрағаның бірінші орынбасары, 2011-2015 ж. ҚР Президентіне үміткер Н.Ә.Назарбаевтың Шымкент қаласындағы сайлауалды штабының төрағасы.
2013 жылдан Халықаралық Психологиялық ғылымдар академиясының корреспондент мүшесі.
Шымкент қаласының, Мақтаарал ауданының және Оңтүстік Қазақстан облысының «Құрметті азаматы».
Бүгінде Түркістан облыстық мәслихатының депутаты, Түркістан облыстық мәслихатының азаматтардың құқықтарын қамтамасыз ету және жергілікті өзін-өзі басқару жөніндегі тұрақты комиссиясының төрағасы. Түркістан облыстық Қоғамдық кеңесінің төрағасы, «Жаңару» сыбайлас жемқорлыққа қарсы жалпыұлттық қозғалысы» РҚБ Түркістан облыстық филиалының директоры.
Жанұялы. 7 (жеті) баланың әкесі. Әкесі – Мелдеханов Пердебек 1914 жылы туылған, 1956 жылы қайтыс болған. Анасы Нүрсеитова Злиха 1920 жылы туылған, 1985 жылы қайтыс болған.
1993 жылдан бастап Туркия, Англия, Франция, Германия, АҚШ, Филиппин, Жапония, Италия, Испания, Оңтүстік Корея және басқа мемлекеттерде іс-сапарларда болып қайтқан.
Еңбектегі табыстары үшін: «Құрмет» орденімен, «ҚР Құрметті депутаты» медалімен, одан басқа да 25 төсбелгі медальдарымен марапатталған.
Өмірзақ Пердебекұлының қайтыс болуына байланысты отбасы мен жақындарының қайғысына ортақтасып, көңіл айтамыз.
