Президент Қасым-Жомарт Тоқаев Қазақстанды цифрлық дамыған мемлекетке айналдыру стратегиялық мақсат екенін айқындады. Осы орайда нақты жоспарлар құрылып, жұмыстар қолға алынып жатыр. Мемлекет басшысы бұл туралы өзінің «Әділетті Қазақстанның экономикалық бағдары» атты Қазақстан халқына Жолдауында ерекше атап өткен болатын.
«Біздің маңызды стратегиялық міндетіміз – Қазақстанды ІТ мемлекетке айналдыру. Цифрландыру ісінде нақты жетістіктеріміз де жоқ емес. Біз электронды үкіметті және финтехті дамыту индексі бойынша әлем көшбасшыларының қатарында тұрмыз. Былтырдың өзінде ІТ саласындағы экспортымыз бес есе өсті. Жыл соңына дейін бұл көрсеткіш 500 миллион долларға жетуі мүмкін. Әрине, мұнымен шектелмейміз. 2026 жылға қарай ІТ қызметтерінің экспортын бір миллиард долларға жеткізу – Үкіметке жүктелетін жаңа міндет. Шетелдің ірі ІТ компанияларымен бірлескен кәсіпорындар ашу бұл іске септігін тигізері сөзсіз. Үкімет осы мәселені мұқият зерделеп, нақты ұсыныстар енгізуі керек», деді Президент.
Үкімет басшысы Олжас Бектенов цифрлық кеңседе отандық бизнес субъектілерінің жұмыс көрсеткіштерінің өзгеру динамикасын тексерді. Өңірлерге жұмыс сапарлары шеңберінде барған кәсіпорындардың деректері қаралды.
Өндіріс көлемі, сондай-ақ сатып алушы компаниялармен байланысы арқылы кәсіпорындарды қайта жүктеу бойынша қабылданып жатқан шаралардың әсері зерделенді.
Айта кетейік, бүгінде импорттың жоғары деңгейі байқалып отырған отандық тауарлар мен қызметтерді өндірушілердің тізімі бар компаниялар үшін SMS-хабарландыру іске қосылды. Сондай-ақ 364 компания алғашқы хабарламаларды алды.
Жалпы алғанда, цифрлық жұмыстар өнеркәсіп өндірісінің өсуін қамтамасыз ете отырып, тапсырмалардың орындалу мәртебесін нақты уақыт режимінде бақылауға бағытталған.
Премьер-Министр «Самұрық-Қазына» қорының қазақстандық қамту үлесін арттыру жөніндегі жұмысының нысаналы индикаторларымен танысып, сапалы өзгерістерге қол жеткізу үшін KPI көрсеткіштерін арттыруды тапсырды.
Сонымен қатар цифрлық инвестициялық платформаның пилоттық жобасы таныстырылды. Оның мақсаты – инвестициялық жобаларды іске асыруды жеңілдету әрі жасанды әкімшілік кедергілердің туындауына жол бермеу.
