Қазақстан халқы Ассамблеясының ел халқын топтастыру мен біріктірудің құралы ретіндегі маңызы төтенше жағдай кезінде арта түседі. Түркістандық тұрғындарының назарына ассамблеяның маңызы туралы ақпарат ұсынамыз. Мемлекет басшысы Қасым-Жомарт Тоқаевтың Түркістанға тарихи және рухани елорда мәртебесін беру тапсырмасы аясында жүйелі жұмыстар атқарылуда. Президентіміз 2021 жылғы 21 қазанда өткен Қазақстан халқы Ассамблеясы Кеңесінің отырысында Түркістан облысының әкімдігі, Қаржы және Ұлттық экономика министрліктеріне Түркістан қаласында «Достық үйін» салу жөнінде тапсырма беріп, бұл жұмыстар жүйелі жүзеге асты. Өңірде 50-ден аса этнос өкілдері бір шаңырақ астында бейбітшілікте, тату-тәтті өмір сүруде. Облысымызда 11 этномәдени бірлестік жұмыс істеуде. Олар мемлекеттің өркендеуіне үлес қосып, қазақстандық толеранттылық үлгісін көпке паш етуде. Аталған ғимаратта бүгінде ынтымақтастық бағытындағы түрлі шаралар орындалып келеді.
Осыған дейін Түркістан қаласында жаңадан бой көтерген “Достық үйінде” Қазақстан халқы Ассамблеясы Төрағасының орынбасары – ҚР Президенті Әкімшілігі ҚХА Хатшылығының меңгерушісі Марат Әзілханов Түркістан облыстық қоғамдық даму басқармасы “Қоғамдық келісім” КММ-нің ұжымымен кездесу өткізді.
Жиынға ҚР АҚДМ Қолданбалы этносаяси зерттеулер институтының директоры Талғат Қалиев, Түркістан облыстық қоғамдық даму басқармасының басшысы Ерлан Күзембаев, “Қоғамдық келісім” КММ-нің басшысы Эльмира Жанғазиева, сондай-ақ мекеме ұжымы мен аудан, қалалардағы филиал басшылары қатысты.
Басқосуда Қазақстан халқы Ассамблеясының даму тұжырымдамасы, ҚХА-ның 30 жылдығын ұйымдастыру және өткізу жөніндегі жоспары мен Ассамблеяның қоғамдық жобаларын іске асыру мәселелері талқыланды.
Кездесу аясында ҚХА Төрағасының орынбасары Марат Әзілханов өңірдегі этносаралық татулықты, қоғамдық келісімді нығайтуға үлес қосып жүрген ұжымдағы бірқатар азаматтарды “Алғыс” төсбелгісімен және Құрмет Грамотасымен марапаттады. Сонымен қатар 28 қазанда Қазақстан халқы Ассамблеясының «Бейбітшілік пен келісім жолымен» халық экспедициясы» жобасы бойынша Астана-Қонаев-Түркістан бағытында пресс-тур басталған болатын.
Жоба аясында Түркістан өңіріне іссапармен келген экспедиция делегаттарымен бірқатар іс-шаралар өтті.
Жоба мақсаты – Қазақстан этностары өкілдерінің достығы мен татулығын, келісімін дәріптеу, ҚХА 30 жылдығына орайластырылған тақырыптық имидждік бейнероликтер түсіру. Блогерлер мен экспедицияның басқа да қатысушыларын этномәдени мұраның байлығымен, түрлі этностардың салт-дәстүрлерімен таныстыру. Сонымен қатар Қазақстан халқы Ассамблеясының этникалық тегіне қарамастан Қазақстанның барлық азаматтарының мемлекеттік тілді үйренуіне бағытталған жобаларын ақпараттық сүйемелдейді. Бірінші бағыт бойынша экспедиция мүшелерінің құрамында БАҚ-тың жетекші өкілдері – белгілі тележүргізушілер Надежда Палинка, Аделия Тухбатова, блогерлер – Алина Кан, Расул Серіков, Әділет Доқтырбек, қазақ тілінің жанашырлары Анастасия Нұғұманова, Анеля Пимичева, сондай-ақ этномәдени бірлестіктердің өкілдері Рустам Қайрыев, Адам Бойсаев бар.
Пресс-тур аясында экспедиция мүшелері Түркістан қаласында жаңадан бой көтерген «Достық үйімен» танысты. Сондай-ақ «Қоғамдық келісім» КММ-сі ұжымымен және облыстық этномәдени бірлестіктер жетекшілерімен кездесті. Кездесуде өңірде этносаралық келісімді нығайтудың өзекті мәселелері талқыланды. Бұдан соң экспедиция мүшелері этнос өкілдері арасында ұйымдастырылған «Кім білгір?» интеллектуалды ойынын көріп, «Татулық – табылмас бақыт» пікірталас алаңында сұхбат құрды.
Пресс-турға қатысушылар бүгін «Достық үйінде» түрік, ұйғыр, шешен-ингуш, татар-башқұрт этностарының тілі, мәдениеті және салт-дәстүрі іс-шарасына қатысты. Сондай-ақ жоба аясында рухани шаһарда ұлттық киім үлгілерінің таныстырылымы мен ұлттық қолөнер және тағамдар бойынша мастер-класс өтеді.
Айта кетсек, пресс-турға қатысушылар Астана-Павлодар-Өскемен бағыты бойынша сапарын жалғастырады.
Қазақстан халқы Ассамблеясының XXXII сессиясында Мемлекет басшысы Қасым-Жомарт Тоқаев ҚХА мен саяси партиялар күш біріктіріп, ел бірлігі жолында бірлесе еңбек етуді тапсырған болатын. Президент тапсырмасы аясында Түркістан өңірінде тиянақты істер атқаруға нақты қадам жасалды. Осы орайда, бүгін Түркістан облыстық Қазақстан халқы Ассамблеясы мен саяси партиялардың облыстық филиалдарының бірлескен отырысы өтті. Жиынға Түркістан облысы әкімінің орынбасары – облыстық Қазақстан халқы Ассамблеясы төрағасының орынбасары Бейсен Тәжібаев модераторлық етіп, бұл басқосудың ел бірлігін нығайтуда маңызы ерекше екенін атап өтті. Алқалы басқосуға Түркістан облыстық қоғамдық даму басқармасының басшысы Аңсар Өсербаев, саяси партиялардың облыстық филиалдарының басшылары, облыстық ҚХА жанындағы құрылымдар мен этномәдени бірлестіктер төрағалары қатысты.
Келелі кездесуде облыс әкімінің орынбасары – облыстық ҚХА төрағасының орынбасары Бейсен Тәжібаев пен саяси партиялардың облыстық филиалдары басшыларымен меморандумға қол қойылды.
– Бұл меморандум қоғамдық келісім мен жалпыұлттық бірлікті нығайту мәселелері бойынша тараптардың өзара ынтымақтастық іс-қимылын қамтамасыз етуге бағытталды. Ел тыныштығы жолында күш біріктірген жергілікті билік пен саяси ұйымдар мен қоғам белсенділерінің ынтымақтастығы қоғамның мызғымас беріктігін нығайта түседі деп сенемін, – деді Бейсен Дәулетұлы.
Шара барысында саяси партиялардың облыстық филиалдарының басшылары елдегі ауызбіршілікті сақтауда түзілген меморандумның маңызына тоқталып, қоғамдық жұмыстарды бірге атқаруға дайын екендіктерін жеткізді. Жиын соңында қоғамдық келісімді сақтау жолында ұсыныс-пікірлер ортаға салынды.
Осы орайда, облыстық Ассамблеяның қатысуымен этносаралық татулық, қоғамдық келісім мен жалпыұлттық бірлікті насихаттау мақсатында түрлі 150-ден астам іс-шара өткізіліп, 15 мыңнан астам облыс тұрғындары қатысқан. Сонымен қатар, бүгінде «Серпін», «Алғашқы жұмыс орны», «Жастар практикасы», «Жас кәсіпкер», «Бизнес бастау», «Дипломмен ауылға» бағдарламалары, жаңа бизнес-идеялар үшін гранттар беру, жеңілдетілген шағын несие үлестіру, колледждерге бөлінген гранттарға этнос өкілдерін тарту бойынша жұмыстар жүргізілуде.
«Қоғамда этнос өкілдерінің этникалық шығу тегіне, діни ұстанымы мен әлеуметтік мәртебесіне орай оларды ешкім кемсітпеуі тиіс. Осы тұрғыда әрбір азамат өзі жасаған әрекетіне заңмен жауап беріп, оның құқықтық салдары қандай болатынын нақты түсінуі керек. Осы тұрғыда халық арасында ақпараттық түсіндіру жұмыстарын тиімді жүргізу, мемлекеттік органдардың жұмысына инновациялық әдістерді енгізу, Ассамблеяның қоғамдық құрылымдары және этномәдени бірлестіктерінің әсіресе жергілікті жерлерде әлеуетін дұрыс пайдалану маңызды. Сонымен қатар, этнос өкілдерінің қазақ халқының маңына топтасып, қазақ ұлтының құрамдас бөлігіне айналуы барлығымыздың ортақ мақсатымыз болуы шарт. Бұдан бөлек, қоғамдық келісімді нығайту және ұлттық бірлікті қалыптастырудағы БАҚ өкілдерінің рөлін күшейту маңызды. Сондай-ақ, жаңа коммуникация мен масс-медианың ұлттық бірегейлікті қалыптастырудағы рөлі ерекше екендігі мәлім. Ақпараттық кеңістікті ұтымды пайдалану арқылы мемлекеттік тілді қолдану аясын кеңейтіп, этностар арасындағы қазақ тіліне деген қызуғылышықты арттыруға қол жеткізуге болады деп есептейміз»,- деді Ғалым Нұрмағанбетұлы.
Бүгінгі таңда өңірімізде мемлекеттік органдар мен ұйымдарда құжат айналымы 100 пайыз мемлекеттік тілде жүргізілуде. Облысымызда мемлекеттік тілді меңгерген халықтың үлесі 95 пайызды құрайды. Ал, этнос өкілдерінің арасында қазақ тілін меңгергендердің саны 74 пайызға жетті. Облыста қазіргі таңда 17 тілдерді оқыту орталығы жұмыс жүргізуде және аталған орталықтарда 1600-ге жуық облыс тұрғыны мемлекеттік тілді үйренуде.
