Қазақстан мен Малайзия тарапы 7 түрлі салада бірлескен жобаны іске асырмақ. Бүгін қос ел үкімет басшыларының қатысуымен өткен инвестициялық жиында құны 350 млн доллардан асатын келісімдерге қол қойылды.
Елімізде малайзиялық капитал құйылған 48 компания жұмыс істейді. Жалпы сомасы 410 млн доллардан асатын 17 бірлескен инвестициялық жоба іске асырылып жатыр. Алдағы уақытта бұл көрсеткіш қаншалықты артуы мүмкін?
Қазақстан үшін Малайзия – туристік және білім беру хабы ғана емес, әлемдік маңызы зор ауқымды нарық. Үкімет басшысы жиын басында осыған мән берді. Инвестициялық ынтымақтастықты одан әрі өрбіту мақсатында Олжас Бектенов малайзиялық кәсіп иелерін қызмет көрсету, өңдеу өнеркәсібі, қаржы, білім беру, жер қойнауын пайдалану, ауыл шаруашылығы және құрылыс саласындағы серіктестікті бірлесе нығайтуға шақырды.
– Бір жыл ішінде екіжақты тауар айналымы $150 млн-нан шамамен $245 млн-ға дейін өсті. Ендігі мақсат – экономикалардың қолда бар әлеуетін ашу және екіжақты сауда көрсеткішін пандемияға дейінгі $650 млн-нан асыру. Біз Малайзияға экспортты әртараптандыруға ниеттіміз, – деді Олжас Бектенов, ҚР Премьер-министрі.
– Кен байыту ісі, халал индустриясы, жасыл энергетика, туризм және цифрландыру. Қазақстанға инвестиция құйылар бағыттың қайсысы болсын әлеуеті зор, – деді Малайзияның үкімет басшысы.
Жиын қорытындысы бойынша қос тарап тау-кен байыту, ислам қаржысын тарту жөнінен серіктестік құруға уағдаласты. Құны 350 млн доллардан асатын 7 келісім жасалды. Енді осы меморандумдар аясында алтынды қайта өңдеу, тамақ өндірісіне қажет өнім шығару және трансформатор майларын өндіру бойынша бірлескен жобалар іске аспақ.
– Хайрикс Ойл деген Малайзия компаниясымен келісімшартқа қол қойдық. Ол компания, Хайрикс Ойл Малайзияда трансформаторлық май және басқа да автокөлік майларын, компрессор майларын шығарады және де біздің келісімшарт – сол технологиямен Қазақстанға алып келіп, Малайзия технологиясымен сол майды шығару, – деді Alageum Electric компаниясы директорлары кеңесінің төрағасы Еркебұлан Ильясов.
