2024 жылғы 23 мамырда Энергетика министрлігі, «ҚазМұнайГаз» ҰК АҚ, «ПетроҚазақстан Ойл Продактс» ЖШС (ПКОП) және CNPC өкілдерінің қатысуымен «Шымкент мұнай өңдеу зауытының қуатын жылына 12 млн тоннаға дейін арттыру» жобасының мәртебесі мен жоспарланған жұмыстары бойынша жұмыс кеңесі өтті.
ПКОП зауыты-өндірістік қуаты жылына 6 млн тонна болатын Орталық Азиядағы ірі мұнай өңдеу зауыттарының бірі. Ол ең алдымен, еліміздің мотор отынына деген қажеттілігін қамтамасыз етеді.
Министрлік мүдделі мемлекеттік органдармен бірлесіп мемлекеттік қолдау шараларын, оның ішінде шикізатпен, инфрақұрылыммен және энергоресурстармен қамтамасыз ету, халықаралық стандарттарды қолдану мәселелерін қарады. Сондай-ақ әлеуетті инвесторлардың қарсы міндеттемелерін айқындайтын ҚР және ҚХР үкіметаралық келісімінің жобасын әзірледі.
Жоба мемлекет басшысының жолдауы шеңберінде жоғары деңгейдегі өңделген өнім шығаратын кластер құруға көзделген басым бағыттардағы 15 ірі жобаның тізіміне кіреді.
Алдын ала есептеулер бойынша жобаны іске асыру автобензин өндірісін 700 мың тоннаға, авиаотын өндірісін 700 мың тоннаға, дизель отынын өндіруді 3,9 млн тоннаға дейін ұлғайтуға мүмкіндік береді.
Жаңа нысандарды іске қосу 2030 жылға жоспарланған.
Сондай-ақ алдағы уақытта Қазақстан Қытай компанияларын сирек кездесетін минералдарды бірлесіп игеруге шақырды. Таяуда Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу екі ел арасындағы экономикалық қарым-қатынастың маңызды тұстарына тоқталған болатын.
«Қазақстан Үкіметі қытай тарапының инвестициялар көлемін арттыра түсуге деген ниетін толық құптайды. Қазір мұнай-газ, химия, металлургия, агроөнеркәсіп, тау-кен өнеркәсібі және басқа да салаларда ондаған ірі бірлескен жобалар жүзеге асырылды. Сонымен қатар, озық технологиялар, инновация және ғылыми-зерттеудегі әлеуетімізді әрі қарай жетілдіру біз үшін аса маңызды», – деген еді Мұрат Нұртілеу Қытайдың Сыртқы істер министрімен кездесуден кейін БАҚ-қа мәлімдеме жасап.
Министрдің айтуынша, екі ел жоғары сапалы технологиялық ынтымақтастыққа ерекше назар аударып отыр.
«Атап айтқанда, елімізде электромобильдер өндірісін құру туралы қытай тарапының ұсынысына қазақ тарапы толықтай қолдау көрсетпек. Өз кезегімізде, сирек кездесетін минералдар қорын бірлесіп игеруге қытай компанияларын шақырамыз», – деді М. Нұртілеу.
Былтыр Қазақстан мен Қытай арасындағы тауар айналымы 41 млрд долларға жеткен.
