Фото: rail-news.kz
«Қазақстан темір жолы» АҚ баспасөз қызметінің мәліметінше, «KTZ Express» акционерлік қоғамы Global DTC Pte Ltd. Қытайдан Еуропалық Одақ елдеріне Қазақстан бойынша теміржол арқылы өтетін тауарларға электронды кедендік ресімдеуді енгізіп жатыр.
Жобаның ресми тұсаукесері 2024 жылғы 23 мамырда Сингапурде Қазақстан Республикасының Президенті Қ.Қ.Тоқаевтың қатысуымен өткен Қазақ – Сингапур Бизнес – форумында өтті.
«Тараптар Транскаспий халықаралық көлік бағдарында Tez Customs цифрлық платформасының тиімді жұмысын қамтамасыз ету бойынша бірлескен іс-шаралар өткізуді жоспарлап отыр. Бұл платформа Қытайдан Орталық Азия елдеріне тауарларды электронды кедендік декларациялау мүмкіндігін береді», делінген 24 мамырдағы хабарламада.
Ұлттық компания сондай-ақ бірлескен бастама көлік логистикасын дамытудың, кедендік ресімдеу процесіне цифрлық технологияларды енгізудің жаңа перспективаларын ашатынын, бұл тасымалдаудың тиімділігі мен ашықтығын арттыруға мүмкіндік беретінін атап өтті.
Еске салак етсек, Өзбекстан іргесіне орын тепкен Дарбаза теміржол стансасынан Мақтааралға тартылатын шойын жол құрылысы өткен жылдың қараша айында басталды. Қазір жалпы ұзындығы 152 км болатын магистралдың астыңғы жол төсемдерін төсеу жұмысы қызу жүріп жатыр.
Мемлекет басшысының тапсырмасымен салынып жатқан Дарбаза – Мақтаарал теміржол желісі республиканың көліктік-транзиттік әлеуетін одан әрі дамытуға тың серпін бермек.
Өткен жылы Қазақстан мен Өзбекстан арасында тасымалданған жүк көлемі 30 млн тоннадан асып жығылды. Тауар бір ғана мемлекетаралық «Сарыағаш» стансасы арқылы экспортталады. Жүк ағыны ұлғайғандықтан аталған бекетте көп кептеліс болды. Жаңа жол құрылысы сол жұмыс істеп тұрған бақылау-өткізу бекетіндегі кептелісті болдырмауға бағытталады.
Сонымен қатар айтулы жоба оңтүстікке экспорттық трафикті арттырады. Бұл желі арқылы Өзбекстан, Тәжікстан, Ауғанстан мен Иранға тауарды жылдам жеткізуге болады. Сондай-ақ Дарбаза – Мақтаарал теміржол магистралі Түркістан облысының дамуына септігін тигізеді. Шойын жол шалғайдағы Мақтаарал мен Жетісайды елдің қалған бөлігімен байланыстырумен қатар, Парсы шығанағына қарай жаңа сауда-қатынас қақпасын ашады. Сөйтіп, елдің транзиттік әлеуетін еселеп арттырады. Бұған әуелі Қытай, одан кейін осы бағыттағы басқа елдер де мүдделі болып отыр.
