Президент Қасым-Жомарт Тоқаев Ғылым және технологиялар жөніндегі ұлттық кеңестің отырысында жасанды интеллектіні дамытатын институттар керек екенін айтқан болатын.
Бүгінде жасанды интеллект күнделікті өмірімізге дендеп еніп барады. Жасанды интеллект қарапайым есептерді шешуде ғана емес, күрделі бағдарламаларды жасауда да өте маңызды. Әлемде жасанды интеллект саласында бәсекелестік дамып барады. Оны астрофизикада қолдану халықаралық астрофизика ғылымын жаңа бір сатыға көтеруге ықпал етіп, әлем елдері осы бағытта еркін пікір алмасып, бірлескен жобаларды жүзеге асыра бастады.
2023 жылы Қазақстанда 35 мың IT-маман даярланды. Бұл туралы Цифрлық даму, инновациялар және аэроғарыш өнеркәсібі министрлігі хабарлады.
IT саласында білікті кадрларды даярлау үшін Epam, Coursera, Samsung, Binance Academy, Huawei, Microsoft, NVIDIA және Glovo сияқты халықаралық IT-компаниялармен тығыз ынтымақтастық орнатылған. Бұл бағдарламаларға 70 мыңнан астам адам қатысқан.
«IT-Airl бағдарламасы аясында 2 мыңнан астам әйел маман No-Code құралдарымен жұмыс істеуге және фрилансингті үйренген. Білім беру саласындағы уәкілетті органдардың күш-жігерінің нәтижесінде 2023 жылы 35 мыңнан астам маман даярланды», делінген министрлік хабараламасында.
Жалпы, жоспар бойынша елімізде жасанды интеллект саласында жыл сайын 1000 маман дарялануы керек. Мемлекет басшысының айтуынша, алдағы уақытта кейбір отандық жоғары оқу орындарында «Google» және «Huawei» халықаралық компанияларының тиісті курстары өтпек. Корея мен Қытайдың жоғары оқу орындарымен білім беру және мамандарды бірлесіп даярлау бойынша келісім жасалды.
Жасанды интеллект саласында жыл сайын 100 стартап іске қосу бойынша міндет қойылып отыр.
