Қазақстанда киберқауіпсіздік саласын дамыту мәселелеріне жіті көңіл бөлінуде. Мемлекеттік органдармен, ҮЕҰ және бизнеспен бірлесіп жүргізілетін жұмыстың нәтижесінде біздің еліміз киберқауіпсіздіктің жаһандық индексіндегі өз позициясын қарқынды жақсарта түсті. Қазір Қазақстан 40-шы орында. Айта кету керек, өткен жылы біздің еліміз 82 орында болған еді.
Өткен жылдар ішінде еліміздің киберқауіпсіздік саласын дамытудың негізгі тұжырымдамалық тәсілдері әзірленді. 2022 жылға дейін әрекет ететін “Қазақстанның киберқауіпсіздігі” тұжырымдамасы әзірленіп бекітілген болатын. Осымен бірге, бірқатар заңнамалық актілер мен көптеген салалық бұйрықтар қолданысқа енді. Бұдан басқа, зиянды кодты зерттеу бойынша АҚ саласында сынақ зертханалары құрылып, ақпараттық қауіпсіздіктің ұлттық үйлестіру орталығы (компьютерлік инциденттерге жеке әрекет ету қызметі (CERT), 7 жедел ақпараттық қауіпсіздік орталығы (SOC)) жұмысын бастады, аталған мамандық бойынша білім гранттарының саны көбейді және т. б.
Ақпараттық қауіпсіздік және жеке деректерді қорғау саласындағы ахуалды одан әрі жақсарту үшін ҚР Цифрлық даму, инновациялар және аэроғарыш өнеркәсібі министрлігі Ақпараттық қауіпсіздік комитетіне азаматтардың жеке басына қатысты деректер өңделетін ақпараттық жүйелердің иелеріне аудит және тексеру жүргізу үшін жеке деректерді қорғау функциясын беру туралы мәселе көтерді.
Қазіргі кезде кез келген ақпараттың жеткіліксіз қорғалуы деректерді ұрлау, компания ресурстарына рұқсатсыз қол жеткізу, сондай-ақ зиянды вирустарды жұқтыруға әкелуі мүмкін. Мұның бәрі түптеп келген ұйымның жұмыс істеу қабілетіне әсер етіп, тіпті құрдымға кетіретін тәуекел болып табылады. Сондықтан бұл жағдайда компанияның деректерін сауатты түрде қорғау оның бәсекеге қабілеттілігі мен дамуын қамтамасыз етудің негізгі шарттарының бірі болып табылады. Бұл, әсіресе, мемлекеттік органдар үшін де өзекті мәселе.
