Қазақстан халқының 85%-дан астамы интернет пайдаланады. Бұл Орталық Азия елдері бойынша ең жоғары көрсеткіш. Олай болатын жөні де бар. Себебі, бүгінде үкімет пен экономиканың негізгі сегменттері цифрлық платформаларға ауысқан. Төлемді де телефон арқылы жасап жүрміз. Осындай ақпараттық технология құралдарын қолдану бойынша да посткеңестік кеңістікте Балтық елдерінен кейінгі орында тұрмыз. Дегенмен, бір медальдің екі беті болатыны сияқты ақпараттық технологияны қолданудың кең өріс алуы киберқылмыстың артуына да алып келеді.
«Касперский зертханасы» тағы бір жағамсыз жайтты айтып, дабыл қақты. Олардың мәліметінше, отызға жуық елдің басты мемлекеттік мекемелерінде жоюға келмейтін қатты дисктегі вирустар табылған. Дискті форматтап, қайта орнатса да ешқандай көмегі болмайды екен. Осындай келеңсіздік бізде де орын алмас үшін дереу «Киберқалқан» құрудың маңызы зор. Тек мемлекеттік мекелемелерде емес, ұлттық компаниялар да желілік технология саласында киберқауіпсіздікке көңіл бөлулері қажет.
«Қазақстанның киберқалқаны» жобасының бірінші кезеңінде ақпараттық қамтамасыз ету саласындағы белгіленген талаптарды сақтаудың толық құқықтық тәжірибесі қалыптасып, білім беру бағдарламалары мен кәсіби стандарттарға ревизия жүргізіліп, киберқауіпсіздік саласында оқытылып жатқан мамандардың саны мен сапасы артуда.
Қазақстанның киберқауіпсіздік саясаты 2013 жылғы «Қазақстанның киберқалқаны» бағдарламасынан бастау алды. Сол уақыттағы киберқауіпсіздік стратегиясы Қазақстанның ұлттық мүддесіне сай келді. Дегенмен, ақпараттық технология күн санап дамып келеді. Демек, киберқауіпсіздік саласында уақыт көшінен, заман талабынан қалмау керек.
2017 жылы Қазақстан кибершабуылдар мен гибридтік баса көктеп кірудің алдын алу, тежеу және тойтару жолдарын көрсететін, сондай-ақ күш салу арқылы анағұрлым тиімді нәтижеге қол жеткізу үшін елдің заңнамалық базасын жетілдіруді нұсқайтын мемлекеттік саясат әзірледі. Осы тұжырымдаманы қабылдау кезінде билік халықаралық сарапшылармен кеңесіп, киберқауіпсіздік саласындағы ең озық тәжірибені алды. «Қазақстанның қиберқалқаны» бағдарламасының бірінші кезеңі 2017-2018 жылдары өтті, ал екіншісі 2019 жылдан 2020 жылға дейін созылды. Бүгінде бағдарламаны жүзеге асыруға 28 млрд теңге жұмсалды.
Цифрлық даму, инновациялар және аэроғарыш өнеркәсібі министрлігі қазіргі уақытта Инвестициялар және даму министрлігіне қарайтын «Мемлекеттік техникалық қызмет» бірлескен кәсіпорнымен ынтымақтастықта «Киберқалқан» іс-қимыл жоспарын іске асыруға жауапты негізгі үкіметтік мекеме болды.
«Қазақстанның қиберқалқаны» бағдарламасы электронды ақпараттық ресурстарды, ақпараттық жүйелерді және телекоммуникациялық желілерді қорғау сияқты салалардағы мемлекеттік саясатты айқындайды, ақпараттық және коммуникациялық технологияларды қауіпсіз пайдалануды да қамтамасыз етеді. Бұл тұжырымдама киберқауіпсіздіктің барлық алдыңғы тәсілдерін біріктіруге көмектеседі. Бағдарламада ақпараттық қауіпсіздік саласындағы, оның ішінде төтенше жағдайлар кезіндегі инциденттердің алдын алу мақсатында шұғыл ден қою тетіктері әзірленді.
