Мемлекет басшысы Қасым-Жомарт Тоқаев «Digital Bridge» халықаралық форумында жасанды интеллектіні нормативтік тұрғыда реттеу қажеттігін айтқан болатын. Қазіргі кезде жүз жиырмадан астам ел бұл мәселені шешу үшін әртүрлі заңнамалық акті қабылдаған.
«Біз озық әлемдік тәжірибеге сай келетін, нарықтың қажеттілігі мен азаматтардың мүддесін ескеретін, құқықтық тұрғыдан реттейтін заманауи база әзірлеу ісін жеделдетуіміз керек. Құқықтық шарттар халықаралық компаниялардың біздің нарыққа келуін ынталандыруы қажет. Жалпы, жасанды интеллект құралдарын адамдардың күнделікті өміріне кіріктіру оңай міндет емес. Бұл ретте олардың құқықтары мен бостандықтары бұзылмауы тиіс», – деді Президент.
Бұл ретте, енді «Яндекс» қосымшасында қазақ тілінде дауыстап сұрақ қоюға болады. Смартфонда дауыстап сұрақ қою мәтін теруден гөрі ыңғайлы.
Қарым-қатынас тілін алдын ала таңдаудың қажеті жоқ. «Яндекс» тіпті орыс және қазақ тілдерін араластырып айтса да түсінеді. Ол үшін тек қолданбаның іздеу жолағындағы микрофон белгішесін басу керек. Дыбыстық сұрауларды тану үшін «Яндекс» қазақ тіліне бейімделген «SpeechKit» технологиясын қолданады. Яғни дауыс мәтінге аударылады, содан кейін іздеуге жіберіледі. Нәтижесінде, қолданушы сұрақты қолмен жазғандай жауап алады. Қазақ тіліндегі сұрау салулар бойынша қолданушылар мемлекеттік тілдегі деректерді ғана емес, сонымен қатар ағылшын, орыс тіліндегі ақпараттардың да аударылған нұсқасын көреді.
«Біз қазақ тіліндегі іздеу жұмыстарын жоспарлы түрде жасап, әлі де дамыта түсеміз. Бұл мүмкіндік желі қолданушыларына ыңғайлы және қазақ тілінің дамуына ықпал етеді», дейді Қазақстандағы қосымшаның аға менеджері Алмаз Сәденов.
Статистикаға сүйенсек, елімізде наурыз айында 12 млн-нан астам адам «Яндекс» қосымшасын қолданған. Бұдан былай оның қазақша жазып, қазақша түсінетіні – жақсы жаңалық. Бірақ мәселе – оның қалай сөйлейтінінде. Егер желі қолданушылары мемлекеттік тілде көбірек әрі сапалы сұрақтар қойса, қосымшаның да қазақшасы дами түспек.
