Бүгін Арыс қаласының тумасы, қаламыздың және Оңтүстік Қазақстан облысының құрметті азаматы, көрнекті қоғам қайраткері, ҚР Парламенті Мәжілісінің депутаты, ҚР Президентінің Құрмет грамотасы мен «Құрмет» орденінің иегері, салиқалы ғұмыры мен бiлімін мемлекетiмiздiң дамуына, өркендеуiне жұмсаған Төлебек Қосмамбетов ағамыз өмірден озды.
Төлебек Қосмамбетов 1947 жылғы 5 шілдеде Оңтүстік Қазақстан облысы Арыс қаласында дүниеге келген. 1967 жылы Алматы халық шаруашылығы институтын инженер-экономист мамандығы бойынша бітірді. Еңбек жолын 1969 жылы Қазақ КСР-ның мемлекеттік жоспарлау аға экономисі қызметінен бастаған ол түрлі жауапты қызметтерді абыроймен атқарды.
1999-2011 жылдары ҚР Парламенті Мәжілісінің депутаты, қаржы және бюджет комитетінің мүшесі болды. 1993 жылы Ресей үкіметі жанындағы ауыл шаруашылығы академиясын табысты бітіріп, ғылыми дәрежеге ие болып, жоғары білікті менеджер атанды. 2001 жылы Мәскеу қаласында кандидаттық диссертацияны қорғап, Ресей Федерациясының білім министрлігі жанындағы жоғары аттестациялық кеңес экономика ғылымының кандидаты деген ғылыми атақ берілді.
Төлебек Байдүйсенұлы зайыбы Гүлістан Кенжеханова екеуі 3 ұл, 1 қыз тәрбиелеп өсірді.
Төлебек ағамыздың қазасына қабырғамыз қайыса тұрып, марқұмның отбасы мен туған-туысқандарына кайғырып көңіл айтамыз.
Абзал ағаның жарқын бейнесі жүрегімізде мәңгі сақталады!
