Түркістан облысы әкімдігі ҚР Цифрлық даму, инновациялар және аэроғарыш өнеркәсібі министрлігі және ҚР Оқу-ағарту министрлігімен бірлесе отырып, пилоттық жоба ретінде «Республикалық ғарыштық байланыс орталығы» АҚ, «Starlink» спутникті интернет желісі арқылы облыс аумағындағы шекара маңында және шалғай, таулы аймақтарда орналасқан 330 орта білім беру ұйымдарын жоғары жылдамдықты интернетпен қамту жұмыстары жүргізілуде. Осы ретте Қазығұрт ауданының білім бөліміне қарасты “Еңбек” жалпы білім беретін мектебінде орналасқан алғашқылардың қатарында Илон Масктың Starlink спутниктік интернетіне қосыла бастады.
Аудандағы 71 мемлекеттік мектептің барлығы интернет желісімен қамтылып, талшықты-оптикалық байланыс желісі арқылы жылдамдығы 20-80 Мбит/с аралығындағы интернет желісі орнатылған.
Мемлекет басшысы Қасым-Жомарт Тоқаев 2023 жылғы 5 қазанда өткен Республикалық педагогтер съезінде барлық орта білім беру мекемелерін сапалы әрі жоғары жылдамдықты интернет желісімен қамтуды тапсырған болатын. Президент тапсырмасының уақтылы орындалуы облыс әкімі Дархан Сатыбалдының тікелей бақылауында. Осы орайда, Түркістан облысы әкімі аппаратының басшысы Еркеғали Әлімқұлов Қазығұрт ауданына іссапармен барып, білім ұяларын сапалы интернет желісімен қамту жұмыстарымен танысты.
Алдымен, аппарат басшысы Қазығұрт ауданы, Еңбек елді мекеніндегі «Еңбек» жалпы орта білім беру мектебінде болды. Мұнда «Республикалық ғарыштық байланыс орталығы» АҚ арқылы SpaceX компаниясының Starlink спутниктік интернет желісі елімізде алғашқылардың бірі болып орнатылған. Интернет желісінің жұмысымен танысып, мектеп оқушыларымен және олардың ата-аналарымен тілдесті. Сондай-ақ, Облыстық білім басқармасы басшысының орынбасары Айгүл Қасымбекова оқушыларға “Billim Land” электронды журнал арқылы презентация жасады.
