ҚР Президентінің 2022 жылғы 03 наурыздағы №826 «Әкімдердің халықпен кездесулерін өткізу туралы» Жарлығын іске асыру аясында, аудан әкімі Исмаилов Азизхан Азимханұлы жеке жұмыс жоспарына сәйкес Қазығұрт, Қарабау, Тұрбат, Қызылқия, Қақпақ, Жаңабазар, С.Рақымов ауыл округтерінен келген бірқатар азаматтарды жеке мәселелері бойынша қабылдады. Жеке қабылдауға аудан әкімінің орынбасарлары мен бөлім басшылары, ауыл округ әкімдері, тиісті мекеме қызметкерлері қатысты. Аудан әкімінің қабылдауында болған азаматтар жол салу, жұмыссыздық, балалар алаңшасын салу, қоқыс жәшіктерін орнату, тұрғын үй сұрау, ФАП салу, әлеуметтік көмек, үй іргелік жер сұрау, ауыз су, мәселелері төңірегінде сұрақтар қойып, өтініштерін айтты. Аудан әкімі Азизхан Азимханұлы барша сұрақтар мен өтініштерге заң аясында толыққанды әрі нақты жауап қатып, шешуге болатын мәселелер бойынша ауыл әкімдері мен бөлім басшыларына тапсырмаларын берді.
Бұдан бөлек, аудан әкімі Азизхан Исмаиловтың үшінші тоқсандағы халықпен жүздесу жиындары басталды. Алтынтөбе ауыл округі Алтынтөбе елді мекенінен басталған кездесу, Жаңабазар ауыл округі Жаңаталап елді мекенінде жалғасын тапты. Кездесу барысында елді мекен тұрғындары тарапынан ауыз су, ағын су, көше жарығы, электр бағаналарын ауыстыру, жол жөндеу және жол кедергісін орнату, жайылым жер, қоқыс полигондары, балалар алаңшасы, медициналық пунк салу мәселелер төңірегінде сұрақтар мен өтініштер айтылды. Ауыл азаматтары тарапынан қойылған барша сұрақтарға аудан әкімі Азизхан Азимханұлы толыққанды жауап беріп, айтылған ұсыныстар бойынша мекеме және бөлім басшыларына тапсырмалар жүктеп, барша мәселенің назарға алынатынын, сондай-ақ кезең-кезеңімен жоспар бойынша шешімін табатынын айтып өтті. Аталған ауыл округі тұрғындары көкейлеріндегі барша сұрақтарға қанағаттанарлық жауап алып, ауыл ақсақалдары аудан әкімі мен барша қызметкерлерге ел атынан алғыстарын білдірді.
Сонымен қатар, Қазақстан Республикасы Парламенті Сенатының депутаттары Ә.Бектаев, М.Қадырбек, А.Сатвалдиевтер Қазығұрт ауданына арнайы іс-сапармен келіп, өнер мектебінде аудан әкімі А.Исмаилов, ардагерлер кеңесі төрағасы А.Омаров және басқа да мүшелері, кәсіпкерлер мен шаруалар, аудандық мәслихаттың депутаттары, аудан әкімдігі қызметкерлері және басқа да аудан активімен кездесті. Жиынның басты мақсаты, Республикалық және Халықаралық заңнамаларға жаңа енгізілген баптар мен толықтыруларды кеңінен түсіндіру, өңірлерде атқарылып жатқан істермен танысу, халықтың көкейінде жүрген сұрақтар бойынша пікір алмасу және шешімін қарастыру болды. Кездесу барысында Сенат депутаттары тарапынан қысқаша баяндама жасалды. Баяндама аяқталғаннан соң сұрақ-жауапқа кезек беріліп, Халықаралық заңнамаларға енгізілген өзгерістер жөнінде, мемлекеттік шекараның тозығы жеткен бағаналарын, жолдарын ретке келтіру жөнінде, күрделі жөндеуді қажет ететін нысандар, ауданның туризмін дамыту бағытында, кәсіпкерлікті қолдау мен шаруаларға төмен пайызбен несиелер беру мәселесі, ауыл шаруашылығына бөлінетін субсидиялар жөнінде, органикалық өнімдерді өндіруге мемлекет тарапынан қолдау көрсету сынды түрлі ауқымды тақырыптар төңірегінде сөз қозғалды. Бірқатар сұрақтарға сенаторлар нақты жауаптарын айтып, іске асатынын ұсыныс ретінде жазып алып, қолдан келгенше көмек көрсетілетінін тілге тиек етті.
Кездесу аяқталғаннан соң ҚР Парламенті Сенаты депутаттары аудан әкімі және тиісті қызметкерлерімен бірге Шарбұлақ ауыл округі Ақбастау елді мекеніндегі 150 орындық мектепке және Қ.Әбдәлиев ауыл округі Атбұлақ елді мекеніндегі «Ақбура» бұлақ көзінен салынып жатқан қосымша ауыз су қоймасының құрылысы барысымен танысты. Құрылыс нысандарының кемшіл тұстарын айтып, бірнеше түзетулер енгізілу керегін ескертті. Аудан әкімі А.Исмаилов құрылыс барысын жеке бақылауына алып, уақытылы әрі сапалы аяқталуын қадағалайтынын айтты.
