24 мамыр күні Қазығұрт ауданының Қ.Мәмбетұлы және Жіңішке ауылдарында қатты нөсер жауын-шашын салдарынан сел жүріп, бірқатар аумақтарда су басу жағдайлары тіркелді.
Қазіргі таңда жауын-шашын тоқтап, жағдай бақылауға алынған. Оқиға орын алған аумақтарда Қазығұрт ауданы әкімдігінің коммуналдық қызметтері мен төтенше жағдайлар бөлімінің мамандары күшейтілген режимде жұмыс жүргізуде.
Аудан аумағындағы арық-атыздар мен су өткізу арналарына тазалау жұмыстары жыл басынан бері тұрақты жүргізілген. Алайда нөсер жауынның шамадан тыс түсуіне байланысты кей аумақтарда су арнасынан асып кеткен.
Аудан әкімдігінің мәліметінше, қазіргі уақытта арнайы техникалар жұмылдырылып, су ағындарын өзен арналарына бағыттау, көшелер мен аулаларды тазарту және қауіпті аймақтарды бақылау жұмыстары үздіксіз атқарылуда.
Сел салдарынан Қ.Мәмбетұлы ауылында 14 тұрғын үйдің, ал Жіңішке ауылында 30 тұрғын үйдің ауласына су кірген. Қазіргі уақытта аумақтарда су бұру, тазалау және қалпына келтіру жұмыстары жүргізілуде.
Жалпы апат салдарын жою жұмыстарына 12 арнайы техника мен 120 адам тартылған. Атап айтқанда, 1 КамАЗ, (комбинирленген жол техникасы), тіркемесі бар 4 трактор, 2 дана “3в1” арнайы трактор, 4 жүк тиегіш (погрузчик) және 1 грейдер жұмылдырылды.
Сонымен қатар, қосымша 30 маман мен қажетті күш-құралдар өңірге жеткізіліп, жұмыстар кезең-кезеңімен жалғасуда.
Ұлттық сапа орталығының Түркістан филиалы мамандары оқиға орнына барды. Жолдың жай-күйімен танысты.
1 санатты инженер Нұржан Әшірматтың айтуынша, су шайған жолға ешқандай зақым келмеген. Трассаның астындағы су құбырлары да орнында.
Ведомство мәліметінше, сенбі, жексенбі күндері қатты нөсер жауын салдарынан сел пайда болған. Екі қырдың арасынан ағып келген тасқын республикалық маңызы бар KZ 13-03 жолының 746 шақырымындағы су өткізу құбырына сыймай, үстін шайып өткен. Тасқын Жіңішке ауылы тұсындағы арыққа құйылып, сай саланы қуалап, 5 шақырымға ұласқан. Сөйтіп Сарапхана елдімекеніне жеткен. Қазір жағдай бақылауда, жол мен құбырлар тазартылып жатыр.
