Бүгін аудан орталығындағы жастар аллеясында «Ұлттық домбыра күні» іс-шарасы аталып өтті.
Шараға аудан әкімінің орынбасары Берік Тұрлыбеков қатысып, барша аудан тұрғындарын домбыра күнімен құттықтады. Ұлтымыздың асыл құндылығының бірегейі домбыраны насихаттауға сіңірген еңбегіңіз үшін домбыра жасаудың шебері, күйші-сазгер Ергешбай Дөңбайұлы мен О.Тайманов атындағы өнер және саз мектебінің домбыра пәнінің мұғалімдері Ақназ Сайлаубекқызы мен Жазира Жолдасбекқызына аудан әкімінің алғыс хатын табыс етті.
Іс-шарада бірнеше күйлердің авторы Ергешбай Дөңбайұлы домбыра жасаудың тарихына тоқталып, өзінің «Ел жаңа» күйін орындап берді.
Мерекелік іс-шарада О.Тайманов атындағы өнер және саз мектебінің ұстаздары мен оқушылары және аудандық мәдениет үйінің өнерпаздары «Қосбасар», «Туған жер», «Секіртпе», «Қарасай», «Балбырауын», «Домбыра – досым» күйлері мен әндерін орындап, көтеріңкі көңіл күй сыйлады.
