Мемлекет басшысы Қасым-Жомарт Тоқаев «Әділетті Қазақстанның экономикалық бағдары» атты Қазақстан халқына Жолдауында еліміздің ауыл шаруашылығы өнімдерінің көлемін арттыру қажеттігін және бұл стратегиялық міндет екенін атап өтіп, саланы дамытудың негізгі бағыттарын айқындап берген болатын. Ауыл шаруашылығы өнімдері жәрмеңкесінің де бағаны тұрақтандыруға әсері мол. Осы ретте бүгінде Түркістан қаласында дүкендер мен саудан орындарында бағаны тұрақтандыру бойынша тиісті жұмыстар атқарылуда. Жалпы Түркістан қаласында жалпы 25 ірі супер маркет, 3 көтерме сауда орны және 187 дүкен бар.
Одан бөлек, әлеуметтік маңызы бар азық-түлік тауарларының бағасын тұрақтандыру мақсатында – 13 әлеуметтік дүкен жұмыс жасауда. Сондай-ақ, 4 ірі сауда орталықтарында, айта кетсек Дастархан, Бәйтерек, Береке, Шапағатта арзандатылған ӘМАТ өнімдері тұрақты сатылымға қойылып, 30 дүкенде әлеуметтік бұрыштар жұмыс істеуде.
Шаһарда азық-түліктерді бастапқы бағасынан 15 пайыздық үстемеақыдан асырмау қажеттігі туралы 25 әмбебап дүкен иелерімен меморандум түзілген. Аталған дүкендер келісімді бұзған жағдайда заң аясында шара көріледі. Қазіргі таңда, қала аумағында әлеуметтік маңызы бар азық-түлік тауарларының бағасын тұрақтандыру мақсатында Түркістан қаласы әкімдігі және Түркістан облыстық кәсіпкерлік және сауда басқармасының қызметкерлерімен біріге ӘМАТ бағасына мониторинг жұмыстары жүргізілуде.
Жыл басынан бергі көрсеткіштер бойынша- 187 шағын дүкенде, 4 ірі сауда орталығында, 20 әлеуметтік дүкенге бақылау жүргізіліп, баға тұрақтылығын сақтау бойынша түсіндірме жүргізілді.
Сонымен қатар, бұдан былай Қазақстанның сауда нүктелеріндегі таразылар тексерілетін болады. Министрліктің мәліметінше, мемлекеттік реттеуге жататын өлшемдер тізбесі сауда-коммерциялық операциялар кезіндегі тауарлар салмағының өлшемдерімен толықтырылды. Басқаша айтқанда, енді әрбір сауда объектісі елдің барлық облыстарында бар аккредиттелген тексеру зертханаларының аттестатталған тексерушілерінің көмегімен таразыларын жыл сайынғы міндетті салыстырып тексеруден өткізуі тиіс.
“Егер бұрын салыстырып тексеру туралы талап тек сатылатын тауарлардың геометриялық параметрлерін өлшейтін өлшем құралдарына қатысты болса енді таразылар да қосылды”, – деп атап өтті ведомство өкілдері.
Салыстырып тексерудің мәні – өлшем құралдарының міндетті метрологиялық талаптарға сәйкестігін растау. Ол үшін аттестатталған салыстырып тексеру әдістемесі пайдаланылады, бірқатар іс-шаралар жүзеге асырылып, нәтижесінде оң нәтижелері салыстырып тексеру таңбасының бедерімен куәландырылады, ал теріс жағдайда өлшем құралының жарамсыздығы туралы хабарлама жіберіледі.
Рәсімнің шығыны көп емес, сарапшылардың бағалауы бойынша нарықтағы орташа есеппен 5000 теңгеден сәл асады және арнайы гірлерді пайдалануды көздейді.
Өзгерістер “Өлшем бірлігін қамтамасыз ету туралы” заңның қолданыстағы ережелеріне негізделген. Заң талаптарын сақтамағаны үшін “Әкімшілік құқық бұзушылық туралы” кодекстің 419-бабында жеке (30 АЕК) және заңды тұлғаларға (230 АЕК-тен 600 АЕК-ке дейін) айыппұл түрінде жауапкершілік қарастырылған.
Жаңашылдық ауылшаруашылық жәрмеңкелеріне қолданылмайды деп қосты сауда министрлігі.
