ҚР Президенті Қасым-Жомарт Тоқаев Қазақстан халқына Жолдауында Президенттің өкілеттігін біртіндеп қысқарта отырып, Парламенттің рөлін айтарлықтай арттыру керектігі туралы айтты. Сол арқылы мемлекетіміздің институционалдық тұғыры нығайтылмақ.
Сонымен қатар Мемлекет басшысы халыққа Жолдауында Президенттің партия мүшесі болуын заңды тұрғыдан тоқтатуды ұсынды. Айтуынша, бұл норма саяси бәсекелестікті арттырады, барлық партиялардың дамуына тең жағдай жасайды.
Мұнан бөлек, әкімдердің партия филиалдарын басқаруын тоқтату керектігін айтты. «Әкімдер мен олардың орынбасарларына партия филиалдарында қызмет атқаруға заң жүзінде тыйым салу керек. Мұндай шешімдер көпполярлы партиялық жүйені қалыптастыруға мүмкіндік береді», -деді Қасым-Жомарт Тоқаев.
Мұның өзі бір лауазымды тұлғаның қолында өкілеттіліктердің шоғырлануы қоғамға қандай да бір теріс ықпалын тигізуі ықтимал деген ой-тұжырымнан шыққаны түсінікті.
Президенттің айтуынша, биліктің қай деңгейі болсын бастысы халықтың мүддесі қорғалуы керек. Мемлекет басшысы барлық азаматтар үшін мүмкіндіктер теңдігінің мызғымас кепілі болуға тиіс. Осы орайда Президенттің жақын туыстары үшін квазимемлекеттік сектордағы саяси мемлекеттік қызметшілер мен басшылар лауазымдарына орналасуға заңнамалық тыйым енгізілетін болды.
Бүгінгі Жолдаудың мән-маңызы айрықша. Ауқымы кең, мазмұны да бөлек екендігін айта кеткім келеді.
Эльмира ЖАНҒАЗИЕВА,
Түркістан облыстық қоғамдық даму басқармасы «Қоғамдық келісім» КММ-нің басшысы
