Бүгін «AMANAT» партиясы Түркістан облыстық мәслихатындағы депутаттық фракцияның кезекті мәжілісі Түркістан облысының әкімі Нұралхан Көшеровтың қатысуымен өтті. Партияның Түркістан облыстық филиалының төрағасы, облыстық мәслихаттағы депутаттық фракцияның жетекшісі Алтынсары Үмбетәлиевтің төрағалығымен өткен жұмыс жиынына Түркістан облыстық мәслихатының төрағасы Нұралы Әбішов, облыс әкімінің бірінші орынбасары Зұлпыхар Жолдасов, облыстық мәслихат депутаттары, жауапты басқарма басшылары, облыстық партия филиалының Саяси кеңес мүшелері, облыстық партиялық бақылау комиссиясының өкілдері, партия филиалының жауапты қызметкерлері, бейнебайланыс жүйесі арқылы аудан, қала әкімдері, мәслихат төрағалары, аумақтық партия филиалдарының төрағалары мен атқарушы хатшылары қатысты.
Мәслихаттың, әкімдіктің және саяси партияның ортақ мақсат жолындағы мызғымас бірлігін бекемдеуге арналған жұмыс жиынында «AMANAT» партиясының 2023-2027 жылдарға арналған «Халықпен бірге!» сайлауалды бағдарламасын Түркістан облысы бойынша іске асыру жөніндегі Жол картасының орындалу нәтижелері, осы кешенді жоспар бойынша 2025 жылы атқарылуы керек индикаторлық көрсеткіштер, мектептер құрылысы, облыстағы апатты және үш ауысымды мектептер мәселесін түбегейлі шешу, Түркістан қаласын еліміздің рухани, тарихи-мәдени, туристік орталығы және сәулет мұрасы ретіндегі ерекше мәртебесі шеңберінде дамыту мәселелері қаралды.
Жиынның маңыздылығын атап өткен Алтынсары Дүйсенбекұлы, «AMANAT» партиясының Сайлауалды бағдарламасы – бұл қоғамда әбден қайнап, пісіп-жетілген күрделі мәселелерді шешудің нақты жолдары көрсетілген кешенді жоспар екенін айтты. «Біз сайлауға түйткілді мәселемізді шешетін, өмірді жақсартатын бағдарлама әзірлеп, Жол картасын арнайы бекіттік. Бұл бағдарламаның авторы – бізден көмек сұраған, ұсыныстары мен талап-тілектерін білдірген бүкіл халық, қалың бұқараның партияға үлкен сеніммен жүктеген аманаты. Жұртшылықтың аманатын уақытылы әрі сапалы орындамау, партия атына келетін сын», – деді Алтынсары Үмбетәлиев.
Партияның Сайлауалды бағдарламасын Түркістан облысында іске асыруға арналған Жол картасында 2023-2027 жылдар аралығындағы кезеңде атқарылуы керек 136 индикатор, 542 іс-шара белгіленген. Құжаттың сапалы орындалуына тұрақты бақылау мен мониторинг күшейтіліп, әр бағытқа жауапты мәслихат депутаттары бекітілгені, партиялық бақылау бекеттері мен өңірлік штабтар құрылып, әкім орынбасарларының есептерін тыңдау жұмыс тәжірибесі енгізілгеніне баса мән берілді. Жол картасы тармақтарының орындалуын бақылауда барлық деңгейдегі мәслихат депутаттары санатынан партиялық фракцияның 254 мүшесі жауапты болып бекітілгені айтылды. Өңірлік партия филиалының депутаттық әлеуеті арқылы 2024 жылы 625 рет нысандарға мониторинг жүргізілген болса, партия бақылауындағы 41 нысанға тақтайшалар қойылған, 30 нысанда партиялық бақылау бекеттері ашылған.
Жол картасы тармақтарының орындалуы республикалық партиялық бақылау комиссиясының отырысында қаралып, облыс әкімінің орынбасары Нұрбол Тұрашбеков есеп бергені жария етілді. Сондай-ақ осы тақырып шеңберінде облыстағы фракциялардың 115 отырысы өткізіліп, Жол картасына қатысты тармақтар бойынша 68 мәселе қаралған. Соның ішінде облыстық фракцияның 8 отырысы өтіп, өзекті мәселелер бойынша, жауапты басқармалар мен департаменттердің, облыс, аудан, қала әкімдерінің есептері тыңдалған, тиісті тапсырмалар берілген.
Жиын барысында саяси ұйымның айрықша бақылауында тұрған Жол картасының орындалуы бойынша партияның облыстық филиалы атқарушы хатшысының орынбасары, фракция мүшесі Қалыйма Жантөрееваның хабарламасы тыңдалды. «Жол картасында қамтылған міндеттемелердің орындалуы бойынша Отырар, Төлеби аудандары мен Арыс қаласы алдыңғы қатардан көрінсе, Келес, Мақтаарал аудандары индикаторларды орындау бағытындағы жұмыстарын күшейтуі қажет», – деді.
Бұл бағытта өткен жылдың қорытындысымен Сайлауалды бағдарлама аясында жалпы құны 101,9 млрд. теңгені құрайтын 19 инвестициялық жоба іске асып, 1 653 жұмыс орындары ашылған. «Туған жер» жобасы аясында меценаттардың есебінен 64 нысан салынып, 15 нысан жөнделген. Барлығы 61 мыңнан астам тұрғынды құрайтын 17 елді мекенге берілетін ауыз судың сапасы артса, 75 мыңға жуық тұрғыны бар 54 елді мекен табиғи газға қосылған. Облыс бойынша 225,2 шақырым автомобиль жолдары жөнделген. Кентау қаласынан Байылдыр ауылына баратын жол пайдалануға берілсе, №5 жылу энергоорталығы кешенді жаңғыртудан өткен. Ордабасы ауданы Шұбар ауылында полиция пункті салынып, Бөген ауылындағы полиция пункті күрделі жөндеуден өткен. «Жер Аманаты» жобасы аясында 70,9 мың га. жер қоғам игілігіне қайтарылған. 36 мектеп, 23 медициналық нысан пайдалануға берілген, 77 мектептің қазандықтары қатты отыннан газға ауыстырылған. Осы және өзге де жұмыстар облыс әкімдігі, жергілкті атқарушы органдар, мәслихат депутаттары және партияның күш біріктіруімен атқарылғаны айтылды.
Жол картасында қамтылып, орындалуы біршама уақыт талап ететін 10 тармаққа жан-жақты тоқталған Түркістан облысы әкімінің бірінші орынбасары Зұлпыхар Жолдасов, өңір экономикасының негізгі саласы болып табылатын ауыл шаруашылығында өткен жылы өнім көлемі 1 трлн. теңгеден асып, өсім 106,9 пайызды құрағанын айтты. Өнім көлемін ұлғайту, «Ауыл аманаты» бағдарламасын іске асыру бағыттарында жүйелі жұмыстар жалғасын табатынына сенім білдірді. Грант беру, жастарды жеңілдетілген несиемен қамту, үш ауысымды және апатты мектептер мәселесін түпкілікті шешу, Түркістан қаласында демеушілер есебінен «Ана мен бала» орталығын салу, тозығы жеткен көпқабатты тұрғын үйлерді жаңарту міндеттемесі, «Созақ-Тасты-Қылти» автомобиль жолының құрылысы, күн электр станциялары мен гидроэлектростанциялар құрылысын жүргізу, өрт сөндіру деполарының құрылысы мәселелері тұрақты бақылауға алынып, тиісті жұмыстар жүргізілетінін жария етті. Сондай-ақ, Жол картасының 2025 жылға арналған жұмыс көрсеткіштері баяндалды.
Жиын барысында «AMANAT» партиясы Түркістан облыстық филиалы атқарушы хатшысының орынбасары Полат Тұрсынбаев Жол картасында жоспарланған Кентау қаласы бойынша – 2, Түркістан қаласы бойынша – 4, Сарыағаш ауданы бойынша – 4 мектептің құрылыс мерзімдері туралы сауал қойды. Депутат Жаңабай Ағабеков Келес ауданында салынуы тиіс 10 МВт күн электр станциясының құрылысы бойынша мәселе көтерді. Бұл бағыттар бойынша атқарылып жатқан жұмыстар туралы мағлұмат берілді.
Жол картасының мектептер құрылысы мәселесі бойынша хабарлама жасаған Түркістан облыстық білім басқармасы басшысының орынбасары Айгүл Қасымбекова облыс бойынша жалпы 1093 орта білім беру мекемесінде 553 604 оқушы білім алатынын мәлімдеп, мемлекеттік мектептің 799-ы – типтік, 123-і – ыңғайластырылған ғимараттарда орналасқанын жеткізді. «Партияның Сайлауалды бағдарламасы шеңберінде 96 мектепті салу жоспарланған. 2024 жылы бюджет есебінен 50 мектептің құрылыс-монтаждау жұмыстары басталып, 26 нысан пайдалануға берілді. Оның, 29-ы – «Жайлы мектеп» Ұлттық жобасымен, 21-і – облыстық бюджет есебінен жүргізілді. Жеке қаржы есебінен – 35 мектептің құрылысы атқарылуда. 2025 жылы 29 нысанның құрылысын жүргізуге бюджеттен 36,7 млрд. теңге бөлінді. Жыл қорытындысымен 20 нысанның құрылысы аяқталып, пайдалануға беріледі. 9 нысанның құрылыс жұмыстары 2026 жылға өтпелі болады», – деді Айгүл Ерғалиқызы.
Облыс көлемінде 1 – апатты және 2 – үш ауысымды мектептер мәселесін шешуде нақты қадамдар белгіленгені айтылды. Бұған дейін үш ауысымды мектептер санатында болған Созақ ауданы, Шолаққорған ауылындағы 900 орындық «№14 Т.Әлімқұлов атындағы мектеп-лицей интернатының» құрылысы «Жайлы мектеп» Ұлттық пилоттық жобасы шеңберінде оң шешілгені хабарланды. Апатты деп танылған Жетісай ауданы, Қызылқұм ауылындағы «№57 «Сарыарқа» жалпы орта мектебінің құрылысын жүргізуге жобалау-сметалық құжаттамасын әзірлеуге қаржы бөлініп, тапсырыс берілген. Екі үш ауысымды мектептер санатындағы Қазығұрт ауданының «Шарбұлақ», Сайрам ауданының Ә.Бөкейхан атындағы жалпы орта мектептерінің құрылыс-монтаждау жұмыстарын жүргізуге мердігер ұйыммен келісімшарт түзілген, аталған нысасндардың құрылысы 2026 жылға өтпелі екені жарияланды.
Басқарма өкілінің хабарламасын талқылаған фракция мүшелері, облыстың білім саласындағы өзекті мәселелерге тоқталды. Атап айтқанда депутат Ғабиден Қапалбаев Бәйдібек ауданындағы Ы.Алтынсарин мектебінің мәселесін көтерсе, депутат Нұржан Жамалбеков Сайрам ауданындағы №6 мектеп-интернаттың қазіргі ахуалын баяндап, жатақханасы тозғанын жеткізді. Жібек жолы ауылдық округі, Сиқым ауылынағы №46 Амангелді атындағы орта мектептің мәселесіне де көңіл бөлу қажет екенін атап өтті. Сайрам ауданындағы оқу-өндірістік комбинатын техникалық жаңғырту мәселесі өзекті екенін айтты. Осы санатта Қазығұрт ауданы Тұрар Рысқұлов атындағы орта мектепті ағымдағы жөндеуден өткізу мәселесі де көтеріліп, білім ұйымында асхана қаралмағаны, материалдық-техникалық базасы тозғаны жеткізілді. Арыс қаласынан сауал жолдаған партия өкілдері №17 колледжге спорт залын салу қажеттігі туындап отырғанын білдірді. Облыстық мәслихат төрағасы Нұралы Әлмаханұлы білім сапасын көтеру маңызды міндет болып табылатынын білдірсе, депутат Дулат Әбіш аудандық білім бөлімдері басшыларының жұмысын тәртіпке келтіру бойынша ұсынысын білдірді.
Жиында қаралған келесі мәселе – Түркістан қаласының ерекше мәртебесіне сай дамыту міндеттері жөнінде қала әкімі Әзімбек Пазылбекұлы хабарлама жасады. Түркістанның ерекше мәртебе алуы оның алдағы дамуына жаңа серпін беретіні айтылды. Заңмен бекітілген мәртебе Түркістанның әлеуметтік-экономикалық дамуына тың мүмкіндіктер ашып, оның еліміздің басқа аймақтарымен және халықаралық деңгейде байланыстарын одан әрі күшейтуге жол ашқанына баса мән берілді.
Бұл мәселені де депутаттар кеңінен талқылады. Депутат Дулат Әбіш Түркістанның бауырлас қалалармен байланысын арттыру, ішкі туризм мүмкіндіктерін кеңейту мәселелерін қозғаса, депутат Жанар Темірбекова археологиялық ескерткіштер мен тарихи мұраларды реставрациялау ғылыми негізде жүргізілуі керектігіне тоқталып, осы жұмыстарды атқаратын мердігер ұйымдарды анықтауда мемлекеттік тапсырыс беру талаптарын осы саланың мамандарына бейімдеп, мұқият қарастыру керектігіне назар аударды. Ал депутат Жаңабай Ағабеков өңірдің туристік маршруты барлық аймақтарды қамтуы керектігіне көңіл бөлсе, депутат Ғалымжан Елшібай Түркістандағы әрбір мүсін ұлттық рухпен үндесіп тұруы қажет деп байыптады. Орталық Азия аумағындағы маңызды тарихи орын – Самарқанд қаласының тәжірибесін ескерудің маңыздылығына тоқталды, Түркістанда ЮНЕСКО ұйымының креативті қалалар санатында дамыту мүмкіндіктерін қарастыруды ұсынды.
Түркістан облысының әкімі Нұралхан Көшеров фракция құрамындағы депутаттарға облысты дамыту бағытындағы бірлескен жұмыстар жалғасатынын жеткізді.
«– Біздің алдымызда облыс тұрғындары үшін қолайлы орта қалыптастыру және халықтың әл-ауқатын жақсарту міндеті тұр. Өздеріңізбен бірлесіп, бұл бағытта жүйелі жұмыстар атқарылуда. Әлеуметтік инфрақұрылыммен қамтамасыз ету мақсатында өткен жылы жаңа 26 білім нысаны салынып, 337 мектепке жаңғырту жұмыстары жүргізілді. 55 жаңа денсаулық сақтау нысанының құрылысы аяқталды. 30 елді мекенге жаңадан ауыз су құбыры жүргізіліп, қамту деңгейі 95 пайызға жетті. Былтыр табиғи газға 53 елді мекен қосылды. Сонымен қатар 1000 шақырымнан астам жолға құрылыс-жөндеу жұмыстары жүргізіліп, қанағатты жағдайдағы жолдың үлесі 93,7 пайызға жетті. Мемлекет басшысы Қасым-Жомарт Кемелұлының бюджет шығыстарын қайта қарау тапсырмасына сәйкес, облыстық бюджетке оңтайландыру жүргізілуде. Қаржы бірінші кезекте шешуді қажет ететін мәселелерге бағытталады. Ең алдымен біз халықты әлеуметтік инфрақұрылыммен қамту жұмыстарын жүргіземіз. Биыл жаңа 20 мектептің құрылысын аяқтап, 41 мектепті реновациядан өткізуді жоспарлап отырмыз. Қосымша жаңа 32 денсаулық сақтау нысаны пайдалануға тапсырылады. Орталықтандырылған ауыз суға қосылған елді мекен санын 801-ге жеткізу көзделуде. Табиғи газға қосымша 45 елді мекен қосылып, қамту деңгейін 75,3%-ға жеткіземіз. Бұдан бөлек, облыс экономикасының өсімін қамтамасыз ету мақсатында өнеркәсіпті және ауыл шаруашылығын дамытуға басымдық берілуде. Индустриалды аймақтардың жұмысын жандандырып, санын көбейтеміз. Биыл мақта-тоқыма кластері аясында 4 зауытты іске қосу көзделуде. Шардара ауданында крахмал-сірне зауытының құрылысы аяқталады. Осы жұмыстар нәтижесінде 4,5 мыңнан астам өңір тұрғыны тұрақты жұмыспен қамтылады. Бар мүмкіндікті пайдаланып, аймақтың экономикасын көтеруіміз керек. Осы бағытта бірлесіп, белсене жұмыс атқаруға шақырамын», – деді Нұралхан Көшеров.
Фракция мәжілісінің қорытындысымен партияның Сайлауалды бағдарламасын сапалы орындалуын қамтуда бірқатар өзекті міндеттер белгіленіп, олар фракция депутаттарының қолдауымен нақтылы іске асырылатын болды.
«AMANAT» партиясы Түркістан облыстық филиалының баспасөз қызметі
