Биыл – Қазақстан халқы Ассамблеясының құрылғанына 30 жыл. Бірлік, татулық және ынтымақ – елдігіміздің мызғымас тұғыры һәм мемлекетіміздің басты құндылығы. Қазақстан халқы Ассамблеясы міне, осы идеологияны сеніммен, жүйелі жүзеге асырып келеді. Осы Түркістан облыстық Аналар кеңесінің төрайымы Гүлсара Тоққұлованың ұлттық татулық, бірлік жайында пікірін назарларыңызға ұсынамыз.
Бірлік – елдің тірегі, татулық – ұлттың жүрегі. Осы бір қасиетті сөздер Тәуелсіз Қазақстанның әрбір қадамына серік болып келеді. Өткен отыз жылдың ішінде еліміз қаншама қиындық пен сыннан өтті, алайда сол сындарлы кезеңдерден аман-есен өтіп, өсіп-өркендеу жолына түсуіміздің басты себебі – халқымыздың бірлігінде, татулығында, келісімінде жатыр.
1995 жылы Қазақстан халқы Ассамблеясының құрылуы – мемлекетіміздің ұлтаралық келісімді сақтауға, түрлі этнос өкілдерінің мәдениеті мен тіліне құрметпен қарауға бағытталған нақты қадамы болды. Сол кезден бері Ассамблея тек формалды құрылым емес, ел ішіндегі тұрақтылықтың тірегіне, бірлік пен бейбітшіліктің нақты тетігіне айналды. Бүгінде елімізде 130-дан астам ұлт пен ұлыс бір шаңырақтың астында өмір сүріп отыр. Бұл – Елбасының сарабдал саясатының, Мемлекет басшысы Қасым-Жомарт Тоқаевтың сындарлы басқаруының жемісі. Тәуелсіздік жылдары еліміздің әр аймағында этномәдени бірлестіктер, Аналар кеңестері, Ақсақалдар алқасы сияқты қоғамдық ұйымдар құрылып, азаматтық қоғамның дамуына жол ашты. Біз, аналар, сол құрылымдардың алғы шебінде, жас ұрпаққа бағыт-бағдар беріп келеміз.
Ұлттың іргесі – отбасы. Ал отбасының өзегі – ана. Аналар тек өмірдің бастауында тұрған жандар емес, олар – ұлттық тәрбиенің негізгі ұйытқысы. Біз балаға тілі мен ділін, салты мен санасын, діні мен дарынын бойына сіңіріп өсіретін – ананың әлдиі екенін жақсы білеміз.Сондықтан да Аналар кеңесінің алдында тұрған үлкен міндет – ел ішіндегі татулықты отбасынан бастау, әр үйге, әр ұрпаққа, әр жүрекке бірлік дәнін егу.
Бүгінде Түркістан облысы бойынша барлық аудан, ауылдық округтерде Аналар кеңестері жұмыс істейді. Бұл кеңестердің негізгі қызметі – ұлттық құндылықтарды насихаттау, қыз тәрбиесі, отбасылық мәдениет, ұлтаралық татулық пен діни сауаттылықты арттыру.
Бірлік пен келісімді тек ұранға айналдырып қою аз. Ол – күнделікті өмірде, ауладағы қарым-қатынаста, мектептегі тәрбиеде, қоғамдық ортада нақты көрініс табуы керек. Бұл бағытта аналардың алар орны ерекше. Біздің тарихымызда сан түрлі соғыс пен жаугершілікті өткерген халқымыз бейбіт өмірдің қадірін терең түсінеді. Батыр бабаларымыз «Жау жоқта жараңды қасыма» деп, бірлікті бәрінен жоғары қойған. Қазіргі бейбіт күннің әр таңы – сол аманатқа адалдығымыздың көрсеткіші.Бірліксіз ел – берекесіз ел. Бірлігі кеткен жұрттың тірлігі де тұрақсыз. Ал қазақ халқы өз бастан өткерген ауыр тарихи сабақтардың арқасында ынтымақтың, түсіністіктің, кешірімділіктің құндылығын жақсы ұғынды. Сол себепті де бүгінде көпұлтты қоғамымызда татулықтың тұғырын нық ұстап отырмыз.
Қазақстан Республикасының Президенті Қасым-Жомарт Тоқаев өз сөздерінде үнемі ұлттық бірлік пен әлеуметтік келісім мәселесін алдыңғы қатарға қояды. Мемлекет басшысы «Біздің бірлігіміз – көптүрлілікте. Бұл – біздің басты байлығымыз» дей отырып, әр азаматтың, әр этностың осы елдің тағдырына жауапты екенін атап өтеді. Мұндай тұжырым – нағыз мемлекетшілдік және адамгершілікке негізделген формула. Мемлекет басшысының тапсырмасымен жүзеге асып жатқан «Ұлттық құрылтай», «Халық үніне құлақ асатын мемлекет» қағидаттары да – осы келісім мен бірлікке ұмтылған нақты қадамдар. Бұл бастамалар азаматтық қоғам мен мемлекетті жақындатуға, әр адамның үнін естуге бағытталған.
Ел Президентінің шешімімен Түркістан облысының қайта құрылуы – тарихи әділеттіліктің орнауы ғана емес, бұл – рухани жаңғырудың жаңа кезеңі болды. Түркістан – бірліктің, адамгершіліктің, өркениеттің символы. Халық даналығында айтылатын «Түбі – бір түркі, төрі – Түркістан» деген сөз бүгінгі күні өз мән-мағынасын тереңдетіп отыр. Облыста түрлі этностардың достығы мен жарасымды өмірі – еліміздегі татулық саясатының нақты көрінісі. Әсіресе, ауыл-аймақтарда түрлі ұлт өкілдерінің бірлесіп еңбек етіп, ортақ мәселелерді ақылдаса шешіп жатқаны – біздің қоғамның үлкен жетістігі. Аналар кеңесі ретінде біз осындай татулық пен келісімді сақтау үшін әрбір отбасына, әрбір мектепке, әрбір ортаға тәрбиелік бағыттағы жұмыстарымызды үзбей жүргізіп келеміз.
«Бірлік пен келісім жолындағы 30 жыл» – жай ғана уақыт өлшемі емес, ол – тарихтың, тағдырдың, тұрақтылықтың тұтас дәуірі. Алдымызда үлкен міндеттер тұр. Әлем күн сайын өзгеріп, түрлі сын-қатерлер туындауда. Осындай кезеңде ұлттың ішкі бірлігі, рухани тұтастығы, отбасылық тәрбиесі алдыңғы орында тұруы тиіс. Біз осыны әрдайым есте ұстауымыз керек. Біз осы дәуірді татулықпен еңсердік, енді оны болашаққа аман жеткізу – біздің аналық, азаматтық парызымыз.
