Түркістан қалалық полиция басқармасының бастығы, полиция подполковнигі Б. Жанаев пен «Форте» банк өкілі Е. Файзиев Бірлік секторының тұрғындармен кездесіп, олардың ұсыныс-пікірлерін тыңдады.
Кездесудің мақсаты – тұрғындар мен полиция басқармасының арасындағы шешімі табылмай жүрген түйткілді мәселелерді талқылау болатын. Атап айтқанда, жүздесу барысында тұрғындардың көкейтесті сұрақтарының біразының шешімі табылды.
Мәселен, Аягөз көшесі мен Бөржар көшелерінде орналасқан балабақшалар мен мемлекеттік мекемелер маңындағы көшелерге жаяу жүргінші жолақтары мен автокөлік жылдамдығын азайту белгілері қойылатын болды. Сондай-ақ, аталған секторға алдағы уақытта жергілікті учаскелік пункт салынатын болады. Бұл туралы Түркістан қалалық полиция басқармасының бастығы, полиция подполковнигі Б. Жанаев тұрғындармен кездесуде мәлім етті.
«Форте» банк қызметкері интернет алаяқтығына қарсы тұрғындарға түсіндірме жұмыстарын жүргізіп, сауалдарына жауап берді.
Бірлік елді мекеніне жергілікті учаскелік пункт салынуы туралы мәселе көтерілді. Шешімін алдағы уақытта табылатын болады.
