Биыл – Қазақстан халқы Ассамблеясының құрылғанына 30 жыл. Бұл – жай ғана дата емес, елдің бірлігін, татулығын, рухани тұтастығын сақтау жолындағы жүйелі еңбектің, сенім мен жауапкершіліктің, бейбіт тіршіліктің биік белесі. Облыстағы 20-дан астам этномәдени бірлестік пен олардың жанындағы жастар ұйымдары, аналар кеңестері қоғамдық іс-шаралардың ұйытқысы болып отыр. Солардың бірі Кентау қалалық өзбек этномәдени бірлестігінің белсенді мүшесі- Хамитова Шахла. Назарларыңызға Шахланың ассамблея жайлы, татулық пен бірлік туралы пікірін ұсынамыз:
Тәуелсіз еліміздің ең басты жетістігі – тұрақтылық пен қоғамдық келісім. Ал осы құндылықтарды қалыптастырып, дамытуда Қазақстан халқы Ассамблеясының рөлі орасан зор. Ассамблея – ел ішіндегі әрбір этностың үнін естіртіп, тілін, мәдениетін, дәстүрін дәріптеуге мүмкіндік берген, сонымен бірге оларды ортақ мемлекеттік идеологияға жұмылдырып отырған бірегей институт. Мемлекет басшысы Қасым-Жомарт Тоқаев ХХХІІІ сессияда сөйлеген сөзінде: «Бірлік. Жасампаздық. Өрлеу» деген үш ұғым – халқымыздың стратегиялық бағытын айқындайтын негізгі тірек екенін ерекше атап өтті. Бұл сөздер – ел болып өркендеудің, ұлт болып ұйысудың темірқазығы.
Бүгінгі жастар – еліміздің ертеңі ғана емес, қазіргі тұрақтылықтың да белсенді тірегі. Біз, Түркістан облысының Ассамблея жастары, осы идеяны берік ұстанып, достық пен келісімнің, жауапкершілік пен патриотизмнің үлгісін көрсетуге ұмтыламыз. Қазақ елі – көп ұлтты мемлекет. Бұл біздің әлсіз тұсымыз емес, керісінше байлығымыз. Себебі түрлі этнос өкілдері өздерінің ұлттық ерекшелігін сақтай отырып, қазақ халқымен етене араласып, бір мақсат, бір мүдде жолында өмір сүріп келеді. Осы ұстанымды Қазақстан халқы Ассамблеясы нақты іспен дәлелдеп отыр.
Ассамблея аясында өткізілетін мәдени-көпшілік іс-шаралар, ұлттық мерекелер мен форумдар жастардың рухани кеңістігін кеңейтеді, өзара түсіністік пен құрметті нығайтады. Біз – ұлтына, дініне, тіліне қарамастан, ортақ мүдде жолында бірігіп жатқан біртұтас ұлтпыз.
Түркістан – түркі дүниесінің рухани астанасы ғана емес, бірлік пен келісімнің де символы. Облысымызда жұмыс істейтін этномәдени бірлестіктер мен Ассамблея жастары ел ішіндегі ынтымақ пен өзара қолдауды нығайтуда белсенді қызмет атқарып келеді. Бірлік – ұлттың ұлы күші. Татулық – халықтың асыл қасиеті. Ынтымақ – өркендеудің өзегі. Бүгінгі таңда осы үш қасиетті бойына сіңірген Қазақстан халқы Ассамблеясы ел дамуының берік іргетасына айналды. Біз, жастар, осы жолдан айнымай, татулық пен бейбітшілік мұрасын болашақ ұрпаққа аманаттау жолында табанды еңбек ете береміз. Кез келген халықтың рухани биіктігі – оның өзге ұлтқа деген көзқарасынан танылады. Қазақстан бұл тұрғыдан әлемге өнеге көрсетіп келеді. Біз осы биіктен түспеуіміз керек.
2025 жылы Қазақстан халқы Ассамблеясының 30 жылдығы аясында азаматтардың этникалық бірегейлігін сақтау деңгейін бағалау, оның мемлекеттің жалпы бірігу процесіндегі рөлін анықтау, тіл саясатының даму динамикасын қолдау, әр этностың өз өңірінің әлеуметтік-экономикалық әлеуетінің дамуына, бизнесіне және этномәдениетіне қосқан үлесін зерттеу, этносаясат пен этнодемографияның жалпы үрдістерін талдау, этностардың қозғалысын зерттеу бойынша мамандардың жұмыстарымен танысу, тарихи-мәдени байланыстарды қарастыру, этностар мен халықтарды жақындастыру және біріктірудің ішкі және сыртқы факторларын талдау, сондай-ақ Орталық Азия кеңістігінде және халықаралық аренадағы өзара іс-қимылды зерделеу міндеттері қойылды.
2025 жылы басқа да мерейтойлық даталармен қатар «Қазақстан халқы Ассамблеясының» біріктіруші қызметін атап өту жаһандық деңгейдегі ғылыми қауымдастықтың бірігуіне ықпал етіп, 2015 жылы БҰҰ-ның Тұрақты даму мақсаттарында белгіленген әлемдік ауқымдағы бастамалармен үндеседі. Бұл ғылыми зерттеулер мен жобалардың нәтижелерімен танысуға, өзара дамушы салаларды кеңейтуге, этнология, этносаясат және этномәдениет салаларындағы теориялар мен көзқарастар жүйесін енгізу мен жетілдіруге, Қазақстан халқы Ассамблеясының қызметін талдауға және оның бүкіл Орталық Азияға әсерін қарастыруға мүмкіндік береді, бұл мемлекеттің келісім мен өркендеу үлгісі ретінде қарастырылады.
Ел Президентінің шешімімен Түркістан облысының қайта құрылуы – тарихи әділеттіліктің орнауы ғана емес, бұл – рухани жаңғырудың жаңа кезеңі болды. Түркістан – бірліктің, адамгершіліктің, өркениеттің символы. Халық даналығында айтылатын «Түбі – бір түркі, төрі – Түркістан» деген сөз бүгінгі күні өз мән-мағынасын тереңдетіп отыр. Облыста түрлі этностардың достығы мен жарасымды өмірі – еліміздегі татулық саясатының нақты көрінісі. Әсіресе, ауыл-аймақтарда түрлі ұлт өкілдерінің бірлесіп еңбек етіп, ортақ мәселелерді ақылдаса шешіп жатқаны – біздің қоғамның үлкен жетістігі. Аналар кеңесі ретінде біз осындай татулық пен келісімді сақтау үшін әрбір отбасына, әрбір мектепке, әрбір ортаға тәрбиелік бағыттағы жұмыстарымызды үзбей жүргізіп келеміз.
