БИЫЛ ТҮРКІСТАН ОБЛЫСЫНДА 15 СОҒЫС АРДАГЕРІ 1,5 МЛН ТЕҢГЕДЕН БІР РЕТТІК МАТЕРИАЛДЫҚ КӨМЕК АЛДЫ

Қоғам

БИЫЛ ТҮРКІСТАН ОБЛЫСЫНДА 15 СОҒЫС АРДАГЕРІ 1,5 МЛН ТЕҢГЕДЕН БІР РЕТТІК МАТЕРИАЛДЫҚ КӨМЕК АЛДЫ

Сабит Тастанбек

09.05.2023

БИЫЛ ТҮРКІСТАН ОБЛЫСЫНДА 15 СОҒЫС АРДАГЕРІ 1,5 МЛН ТЕҢГЕДЕН БІР РЕТТІК МАТЕРИАЛДЫҚ КӨМЕК АЛДЫ

Мемлекет басшысы Жеңіс күні құрметіне арналған наградалар туралы тиісті жарлықтарға 8 мамырда қол қойды. Жеңіс күні қарсаңында Мемлекет басшысы Ұлы Отан соғысының қос ардагері – Әбдіғали Қаймолдин мен Иван Гапичке «Халық қаһарманы» атағы берілді. Президент тиісті жарлықтарға 8 мамырда қол қойды. Сондай-ақ екі майдангер де ерекше марапат – «Алтын жұлдыз» және «Отан» ордендерімен марапатталады.

Мемлекет басшысының Жарлығымен 1941-1945 жылдардағы Ұлы Отан соғысында көрсеткен қаһармандығы, батылдығы мен жанқиярлығы, соғыстан кейінгі мемлекеттік және қоғамдық жұмыстарға белсене қатысқаны үшін Қаймолдин Әбдіғалиға «Халық қаһарманы» атағы беріліп, «Алтын Жұлдыз» және «Отан» ордендері тапсырылды.

Әбдіғали Қаймолдин 1921 жылы 30 маусымда Семей облысы, Абралы ауданы, Ұзынбұлақ ауылында дүниеге келген. 1941 жылдан 1945 жылдың 9 мамырына дейін Сталинград, 1-Украина, 1-Белорус, 3-Прибалтика майдандары құрамында шайқасты. 1946 жылы маусымда елге оралған. Ал Иван Гапич 1923 жылы 2 ақпанда Ақмола қаласында дүниеге келген. Польшаны, Чехословакияны, Украинаны азат етуге қатысты. Бүкіл соғысты басынан өткеріп, фашистік гарнизондар мен комендатураларды талқандаған, оқ-дәрілер мен азық-түлік қоймаларын талқандаған отрядтың әскери қимылдарына қатысты. 1945 жылы 24 маусымда Қызыл алаңдағы Жеңіс шеруінің қатысушысы болды.

Биыл Түркістан облысында да Жеңістің 78 жылдығын мерекелеу қарсаңында 4 438 азамат жалпы сомасы 175,5 млн теңге көлемінде біржолғы материалдық көмек алды. Оның ішінде Мемлекет басшысының тапсырмасын орындау аясында облысымыздағы 15 ҰОС ардагері мен қатысушысына 1,5 млн теңгеден төленді. Түркістан облыстық жұмыспен қамтуды үйлестіру және әлеуметтік бағдарламалар басқармасының мәліметінше, соңғы деректерге сәйкес, өңірде Екінші дүниежүзілік соғысының 14 ардагері тұрады. Атап айтсақ, Қазығұрт ауданында – 3, Жетісай ауданында – 1, Ордабасы ауданында – 1, Сайрам ауданында – 2, Сарыағаш ауданында – 1, Созақ ауданында – 1, Сауран ауданында – 1, Төлеби ауданында – 1, Кентау қаласында – 1, Түркістан қаласында – 2 майдангер бар.

Таяуда, яғни 01.05.2023 жылы Сауран ауданында тұратын 101 жастағы қарт майдангер Ғани Сарамсаков дүниеден озды. Жалпы, өңірдегі майдангерлердің барлығына 30 сәуірге дейін біржолғы материалдық көмек берілді.

Сондай-ақ Жеңіс күніне орай өңірдегі 4 423 тыл еңбеккерлері мен қаза болған жауынгердің жесірлеріне 30 мың теңгеден, 2 блокадалық Ленинградтың тұрғынына 60 мың теңгеден және 1 кәмелетке толмаған бұрынғы тұтқындарға, ҰОСҚ, ҰОСМ теңестірілген басқа да санаттағыларға 100 мың теңгеден табысталды.

Еске сала кетсек, облыстан Ұлы Отан соғысына 140 мыңнан астам азамат аттанып, оның 70 мыңы елге оралды.

Қазіргі таңда Түркістан облысында тұратын 14 соғыс ардагерінің арасында жасы ең үлкені – төлебилік Рсмет Джұмағұлов, ол биыл 102 жасқа толды. Майдангерлердің ең кішісі – 96 жастағы Түркістан қаласының тұрғыны Әбжаппар Дайрабайұлы.

Еске сала кетсек, Еңбек және халықты әлеуметтік қорғау министрлігінің мәліметіне сәйкес, елімізде қазір 230-дан аса ардагер бар.

Облыс бойынша соғысқа қатысты 324 ескерткіш, 79 мемориал, монументтік кешен бар.

Сонымен қатар, Түркістан облысында 100 жастағы ардагерге үш бөлмелі пәтер берілді.

Сарыағаш ауданының әкімі Арман Абдуллаев Жеңіс мерекесінің қарсаңында 100 жастағы соғыс ардагері Эрмохан Ишхоновқа үш бөлмелі пәтердің сертификатын табыстады. Қария аудан әкіміне алғысын білдіріп, майдан даласында басынан кешкен тарихи оқиғаларын айтып берді. Соғыс ардагері бүгінгі таңда ұл-қыздарынан 33 немере, 49 шөбере және 6 шөпшек сүйіп отыр. Эрмохан Ишхонов 1942 жылы 5 мамырда әскер қатарына шақырылып, соғысқа аттанған. 1948 жылы әскери қызметін тоқтатып, оған I дәрежелі «Отан соғысы», «КСРО Гвардиясы» ордендері берілген. Сонымен қатар «Мінсіз қызметі үшін», «Украинаның 50 жылдығы», «Ерлігі үшін» медальдарымен марапатталған.