Түркістан облысы құрылған 5 жылдың ішінде 2 млрд доллар көлемінде шетелдік тікелей инвестиция тартылған. Өңір басшысы Дархан Сатыбалды орталық коммуникациялар қызметінде өткен брифингіде осындай мәлімет келтірді.
«Түркістан қаласын рухани астана ретінде дамыту бастамасы негізгі капиталға бағытталған инвестиция көлемінің өсуіне ықпал етті. 5 жылда инвестиция көлемі 3 есе артып, облыс экономикасына жалпы 3 трлн теңгедей инвестиция тартылды. Негізгі капиталға бағытталған инвестицияның басым бөлігі жеке көздерден тартылды. 5 жылда облысқа салынған тікелей шетелдік инвестиция көлемі 2 млрд АҚШ долларын құрады. Жалпы сомасы 422 млрд теңгенің133 инвестициялық жобасы іске асырылып, 9 347 жұмыс орны құрылды», – деді Дархан Сатыбалды.
Оның сөзінше, өңірде 5 жылға арналған 368 инвестициялық жоба жоспарланып отыр. Олардың жалпы құны 2,8 трлн теңге болмақ.
«Осы жобалар арқылы 18,5 мың жұмыс орны ашылады. 2023 жылы 48 жоба іске қосылып, 1168 адам жұмыспен қамтылды. Бүгінгі таңда өңірде орталықтандырылған ауыз сумен қамтылған елді мекендердің жалпы саны 720-ға жетіп, қамту деңгейі 86,4% болды. Биыл 18 елді мекенге жаңадан ауыз су құбыры салынып, 12 елді мекеннің тозығы жеткен су жүйелері жаңартылады. 465 елді мекенге газ жүргізіліп, қамту деңгейі 56%-ға жетті. Биыл 68 нысанның құрылысы аяқталып, қосымша 57 елді мекен табиғи газға қосылуға мүмкіндік алады», – деді әкім.
