Елімізде Мемлекет басшысының кезектен тыс сайлауы өтті. Сыртқы саясатта да, ел ішінде де салиқалы көшбасшылығымен, даналығымен абыройы асқан Қасым-Жомарт Тоқаев Президент болды. Жаңартылған Конституцияға сәйкес, Президент екінші мерзімге қайта сайлау құқығынсыз 7 жылға сайланды.
Кешегі сайлау науқанында халық бірауыздылығын таныта білді. Түркістан облысы дауыс беру қорытындысында республика бойынша алғашқы үштіктен көрінді. Бұл – түркістандықтардың саяси сауаттылығымен бірге ынтымақ-бірлігінің, өзінің алдағы жеті жылын Президент Қасым-Жомарт Тоқаевпен бірге болуға бел байлаған ұйымшылдығының белгісі деп ойлаймын.
Дауыс беру кезінде, сайлау учаскелерінде адамдардың болашаққа деген сенімділігі айқын аңғарылды. Жастар тарапынан да ерекеше белсенділік байқалды. Сайлау учаскелеріне отбасымен және жаңадан отау құрып, той көйлегімен келіп көзге түскендер де бар. Біздің азаматтар жоғары мәдениет пен ұйымшылдықты көрсетті.
Сайлау жүйесін талдап қарасақ, бұрынғыға қарағанда азаматтар арасында немқұрайлылық жоқ. Демек, елімізде сайлау мәдениеті әлдеқайда қалыптасып келеді. Ашықтық, әділдік деген ұғымдар көптің санасына енген.
Соңғы уақытта барлық салаларда жүріп жатқан реформалардың нәтижесі көз қуантады. Ата заңға өзгерістер енгеннен кейін конституциялық заңдарға да өзгерістер ене бастады. Сот саласын реформалау, әділ билікті қамтамасыз етуге қатысты нақты жұмыстар атқарылуда. Мемлекеттің мақсаты – азаматтардың тұрмыс сапасын жақсарту десек, осы мақсатты орындауда барлығымыз елдіктің жолында адал еңбек етіп, күш біріктіруіміз қажет.
Қалыйма ЖАНТӨРЕЕВА,
