Мемлекет басшысы Қасым-Жомарт Тоқаев Қазақстан халқына кезекті Жолдауын жасады. Ел тағдыры үшін маңызды мәселелерді сөз еткен Президент әлеуметтік-экономикалық салалардағы кемшіліктерді де, жағымды жаңалықтарды да мәлім етті. Жолдауды тыңдай отырып бір түйгенім – бұл жолы берілген тапсырмалар мен қолға алынған жобалардың көпшілігі өткен жылдары басталған жұмыстарды толықтырып, қуаттай түсететін сыңайлы.
Сондай-ақ, Қасым-Жомарт Кемелұлы өз сөзінде білім беру саласындағы жұмыстардың тұтастығын сынға алды. Сол үшін бес жастан асқан балаларға арналған «Келешек» атты бірыңғай ерікті жинақтау жүйесін енгізуді тапсырды. Тиісінше, бұл бағдарламада мемлекет тарапынан ұсынылатын бастапқы білім беру капиталы, жыл сайынғы мемлекеттік сыйақы және инвестициялық табыс қарастырылатын болады. Сонымен бірге, осы жинақ пен «Ұлттық қор – балаларға» жобасының қаражаты қосылып, өскелең ұрпақтың сапалы білім алуына мүмкіндік жасалмақ.
Одан бөлек, Мемлекет басшысы өз Жолдауында жасөспірімдерге жасалған зорлық-зомбылықтың кез келген түріне қатысты жазаны күшейтуді тапсырды. Жол, ғимарат, киім-кешек, азық-түлік, жалпы балаларға қатысты барлық нәрсе қауіпсіз болуы тиіс екенін айтып, өскелең ұрпақтың психикалық саулығы өте маңызды мәселе болатынын жеткізді.
“Білім беру мекемелеріндегі психологиялық қолдау қызметін институционалды түрде күшейту қажет. Бірыңғай сенім телефонын ұйымдастырған жөн. Зорлық-зомбылыққа және қысымға, яғни буллингке тап болғандарға көмек көрсетуге арналған бағдарлама әзірлеу керек. Сапалы орта білім алу – әрбір баланың мызғымас құқығы. Мұндағы ең түйінді сөз – «сапа». Сондықтан білім сапасын жақсарту және мұғалімдердің біліктілігін арттыру ауадай қажет» – деді Қасым-Жомарт Тоқаев.
Сонымен қатар, Мемлекет басшысы ІТ саласы жайында кеңінен түсіндіріп өтті.
“2026 жылға қарай ІТ қызметтерінің экспортын бір миллиард долларға жеткізу – Үкіметке жүктелетін жаңа міндет. Шетелдің ірі ІТ компанияларымен бірлескен кәсіпорындар ашу бұл іске септігін тигізері сөзсіз. Үкімет осы мәселені мұқият зерделеп, нақты ұсыныстар енгізуі керек.Үкімет жасанды интеллектіні дамыту ісіне баса назар аударуға тиіс. Әлемде алдағы бірнеше жылда осы салаға бір триллион доллардан астам инвестиция салынады деген болжам бар. Жасанды интеллект оны дамыта білген елдердің ішкі жалпы өніміне айтарлықтай үлес қосуы мүмкін.Жасанды интеллектінің мүмкіндіктерін толық пайдалансақ, білім экономикасына тың серпін береміз. Жетекші халықаралық компаниялармен ынтымақтастық орнату керек. Білікті мамандар даярлауымыз қажет. Кемінде үш белгілі жоғары оқу орны жасанды интеллект саласына қажетті кадр даярлаумен және зерттеулер жүргізумен айналысуы керек.Еліміз есептеу қуаттарын жаһандық тұтынушыларға сататын орынға айнала алады. Сондықтан ірі мәлімет орталықтарын салуға инвестиция тарту үшін түрлі жеңілдіктерді де қамти отырып, барынша қолайлы жағдай жасау керек. Сондай-ақ мәліметті сақтау және өңдеу саласында Қазақстанның мүддесін ілгерілету қажет.Цифрландыру ісінде басшылыққа алынатын қағидаттарды заң жүзінде бекітетін кез келді. Үкіметтен, сарапшылар қауымынан, Парламент депутаттарынан біртұтас салалық құжат әзірлеу мәселесімен айналысуды сұраймын.Мен сайлау алдындағы бағдарламамда “Ғылым және технологиялық саясат туралы” заң қабылдау туралы бастама көтерген едім. Қазір әзірленіп жатқан заң жобасында экономикамызды ғылым мен инновацияға сүйене отырып дамыту логикасының көрініс табуы өте маңызды.Бизнес-инкубатор, коммерцияландыру орталығы, технопарк, құрастыру бюросы сияқты инновациялық инфрақұрылымдар құруға қатысты жеке бастамаларға сөз жүзінде емес, нақты іспен қолдау көрсететін пәрменді шаралар керек. Шетелдің озық тәжірибесін пайдаланған жөн.Венчурлық қаржыландыру тәсілі инновациялық жобаларды іске қосуға қажетті негізгі қаражат көзі болуға тиіс. Сондықтан жобаларға еліміздегі және шетелдегі инвесторлардың қызығушылығын арттыру үшін құқықтық және қаржылық мәселенің бәрін шешу қажет”, деді.
Демек, алдағы уақытта да елімізде білім сапасын арттыру, балаларды қауіп-қатерден қорғау жұмыстарына ерекше көңіл бөлінеді деген сөз. Ал, бұл кез келген ата-ана мен осы салаларда қызмет ететін жұмысшылар үшін зор қолдау болмақ.
Индира Икапова,
Түркістан қаласы “Оқушылар сарайының” директоры
