Бурахан Даханов – көпке үлгі болып, Алматы облысы Талдықорған қаласынан солтүстікке қоныс аударған қоғам белсендісі. Ол былтыр «TAUEKEL» ұйымын құрып, мемлекетке пайдасы тиетін дүниелерге белсенді атсалысып келеді. Оның айтуынша, Солтүстікке көшу бағдарламасы көңіліне қонымды іс. Ұлтқа қызмет етем деген адамға керемет мүмкіндік.
Ол фейсбук әлеуметтік желісінде жариялаған жазбасында жақын күндері киелі Түркістан жеріне «Теріскейге көш» мәселесімен баратынын хабарлады.
«Сүйінші, ағайын. Алақай. Мені кеше, Түркістан облысының әкімдігі ресми түрде Оңтүстікке шақырды. Бұйырса, жақын арада «TAUEKEL» ұйымының атынан киелі Түркістан жеріне «Теріскейге көш» мәселесімен барамын.
Жоба бойынша әкімдікпен бірлесіп, аудан-ауылдарды аралауды, кездесулерді бастаймыз. Ия. Адам саны 2,2 миллионнан асып, жылына кем дегенде 60 мыңнан астам сәби туылатын бұл ғажап облыс — Солтүстікке көштің нағыз «адами һәм Қазақи» инвесторы. Сол себепті бұл сапарда барымды салып, қолдан келгенше «көшуге ниетті адамдарды» максималды қамтуым керек. Дегенмен, бұл алғашқы сапар — барлау, бажайлау мақсатында. Не әкімдік қызметкері немесе жұмыспен қамту орталығының арнайы маманы емес, жәй ғана қарапайым адамның агитация мәселесімен бара жатқаны бұрын-соңды бірен-саран ғана болған. Сол себепті қалай, қашан және кімді, қайда көшіру керек екенін өз көзіммен көріп, тәжірибе жинап қайтқым келеді. Қысқасы, облыс, аудан маслихаты депутаттарымен, Түркістанның белді кәсіпкерлерімен жолығып, Теріскейге көштің мәнін, маңыздылығын жеткізуге тырысамын. Барынша сәттілік тілеп қойыңыздар ағайын. Шіркін, жалғыз барып «жүз» адам боп, олжалы қайтсам екен. Ал Оңтүстіктегі ағайын, көрші қолаң, тамыр танысқа айтып, «TAUEKEL» мен кездесуге дайындала беріңіздер. Сіз боп біз боп Теріскейдің босап қалған ауылдарын адамға, кең даласын малға толтырайық. Жазбаны барынша таратып жіберуіңізді сұраймын. Көшке көмегіңіз болсын», – деді ол өз жазбасында.
Сондай-ақ Б. Дақанов жұмыс күші артық өңір саналатын Түркістан облысы көш мәселесімен біраз жылдан бері айналысып келе жатқанын атап өтті.
«Ойлаңыздаршы, облыс бойынша үй кезегінде 75 мың адам, жеке жер үй салуға учаске сұрап, тізімге тұрғандар 410 мыңнан асқан екен. Демек, агитация мәселесі мықтап қолға алынса мына санның кем дегенде 10 пайызын Солтүстікке алып кетуге әбден болады деп ойлаймын. Оның үстіне, биыл Солтүстік өңірлерге көшетін адамдар үшін 6700 квота бөлінген. “TAUEKEL”. Теріскей бізге аманат», – деп қорытындылаған сөзін ол.
