Елімізде 2017 жылы «Цифрлы Қазақстан» бағдарламасы басталғалы Ішкі істер органдарының қызметін цифрландыру мәселесі қарқын ала түскені белгілі. Сонан бері қарайғы 7 жылдың ішінде бұл саланың жұмыстарында көптеген өзгерістер орын алды. Бұл әсіресе халықты құжаттандыру саласында айрықша көрініс тапты. Ал құқықты қамтамасыз ету, азаматтардың қауіпсіздігін қорғау жағында өте зор ілгерілеушіліктерге қол жетті. Қазір бейнебақылау камералары қоғамдық тәртіптің орнықтылығын, жол қозғалысын қадағалауда таптырмас құралға айналды.
Жалпы, жоспар бойынша елімізде жасанды интеллект саласында жыл сайын 1000 маман дарялануы керек. Мемлекет басшысының айтуынша, алдағы уақытта кейбір отандық жоғары оқу орындарында «Google» және «Huawei» халықаралық компанияларының тиісті курстары өтпек. Корея мен Қытайдың жоғары оқу орындарымен білім беру және мамандарды бірлесіп даярлау бойынша келісім жасалды.
Ішкі істер министрлігі 8 «цифрлық» бастаманы жүзеге асырып жатқан болатын. Оның ішінде жалған нөмірлерден келетін қоңырауларды бұғаттау (34 млн қоңырау бұғатталды), автокөліктерді онлайн қайта тіркеу (бұл қызметті 3,7 млн азамат пайдаланды), жүргізуші куәлігін онлайн ауыстыру (бұл қызметті 122 мың азамат алды) және тағы да басқа қызметтер бар.
Сондай-ақ, Экология министрлігінің аңшы куәлігін «цифрландырғаны» мәлім болған. Аталған құжатты рәсімдеуді жоспарлаған әр азамат ағымдағы жылдың 1 қаңтарынан бастап, оның тек электронды түрде ғана берілетінін білуі маңызды. Бұл құжаттың қағаз нұсқасын бірге алып жүру қажеттілігін жояды. Осы ретте мұқабалы аңшы куәлігі үшін төленетін 3 АЕК мөлшеріндегі қосымша алым алынып тасталды. Сондай-ақ Еңбек және халықты әлеуметтік қорғау министрлігі, Денсаулық сақтау министрлігі, Энергетика министрлігі және басқа да мемлекеттік органдар өкілдері «цифрлық» өнімдер туралы баяндаған болатын. Баяндамашыларды тыңдаған Премьер-Министрдің орынбасары азаматтардың ұсыныстары мен шағымдарын ескере отырып, кейбір онлайн қызметтерді пысықтау қажеттігін атап өткен.
Цифрландыру мәселесі Үкімет Аппаратының қатаң бақылауында.
