Қазақстан – цифрландыру саласында жақсы көрсеткіштерге қол жеткізуде.
Бұл орайда, мемлекеттік көрсетілетін қызметтерді цифрландыру азаматтардың уақытын ғана емес, ел қазынасын үнемдеуге де септігін тигізіп жатыр.
Мәселен, ҚР Еңбек және халықты әлеуметтік қорғау министрлігінің мәліметіне сүйенсек, 2023 жылы әлеуметтік-еңбек саласының мемлекеттік қызметтерін цифрландыру бойынша жүргізген жұмыс республикалық бюджеттен 717 млн теңгеден астам әкімшілік шығыстарды үнемдеуге мүмкіндік берген.
«Соңғы деректер бойынша әлеуметтік-еңбек саласында 27,3 млн мемлекеттік қызмет көрсетілді, оның ішінде 24,4 млн электрондық түрде, оның 1,4 млн-ы проактивті көрсетілді. Бүгінгі таңда әлеуметтік-еңбек саласындағы 50 мемлекеттік қызметтің 48-і электрондық түрде, оның ішінде 30-ы проактивті форматта қол жетімді. Министрлік процестерді жеңілдету және жаңа тәсілдерді енгізу арқылы көрсетілетін мемлекеттік қызметтердің сапасын үнемі жақсартып отырады. 2023 жылы 4 мемлекеттік қызмет проактивті форматқа ауыстырылды: «Жасына байланысты зейнетақы төлемдерін тағайындау»; «Мемлекеттік базалық зейнетақы төлемін тағайындау»; «Бірыңғай жинақтаушы зейнетақы қоры салымшысының қаражатының түсуі мен қозғалысы туралы ақпарат беру»; «Міндетті әлеуметтік сақтандыру жүйесіне қатысушыға әлеуметтік аударымдардың жай-күйі мен қозғалысы туралы ақпарат беру». Сондай-ақ, артық немесе қате төленген әлеуметтік аударымдар мен уақтылы немесе толық төлемегені үшін өсімпұлдарды қайтару, сондай-ақ қате аударылған міндетті зейнетақы жарналарын қайтару бойынша 2 қызмет автоматтандырылды. Бұл қызметтер енді «электрондық үкімет» порталында қолжетімді», – делінген ол ақпаратта.
