Қазір біз ақпараттық технология қарыштап дамыған заманда өмір сүріп жатырмыз. Күн сайын аталған салада түрлі тың жаңалықтар пайда болуда.
Сәйкесінше, ақпараттық технология адамдардың тұрмыс-тіршілігін жеңілдетіп, қажетті жұмыстарына жұмсалатын уақыттың үнемделуіне мүмкіндік беруде. Осыған орай осыдан бірер жыл бұрын Қазақстан Үкіметі 2021-2025 жылдарға арналған «Цифрландыру, ғылым және инновация арқылы технологиялық серпіліс» атты ұлттық жобаны қабылдаған болатын. Мұндағы мақсат – Қазақстанды цифрлық трансформация арқылы тиімді мемлекеттік басқаруы бар заманауи ел ретінде қалыптастыру, сенімді деректер негізінде шешімдер қабылдау, сонымен қатар цифрлық дәуірде инфрақұрылымды тиімді және қауіпсіз пайдалануды қамтамасыз ету, ғылымның әлеуметтік-экономикалық дамуға қосқан үлесін арттыру.
Аталған жобаны іске асыру арқылы күтілетін әлеуметтік-экономикалық нәтиже: криптоиндустриядан жыл сайын 79 млрд теңге салық түсіру; АКТ саласындағы ЖІӨ үлесін 5%-ға дейін арттыру; RNNTD коммерцияландыру жобаларын және қолданбалы ғылыми зерттеулерді жеке қоса қаржыландыру үлесін 50 пайызға жеткізу болатын. Сонымен қатар: смартфон арқылы 5 минут ішінде мемлекеттік қызметтерге қол жеткізу; кепілдендірілген жылдамдықтағы интернетпен қамтамасыз ету (қалалар – 10 Мб/с, ауылдар – 5 Мб/с); 100 000 жаңа жұмыс орнын құру; ғалымдар мен зерттеушілер санын 34 мың адамға дейін арттыру көзделген. Ал, ұлттық жоба аясында жоспарланған жұмыстарды жүзеге асыруға 2 255 890 323 мың теңге жұмсалатын болған.
Аталған жобаны ҚР Цифрлық даму, инновациялар және аэроғарыш өнеркәсібі министрлігі, Қазақстан Республикасы Білім және ғылым министрлігі біріге әзірлеген.
Жалпы, жоспар бойынша елімізде жасанды интеллект саласында жыл сайын 1000 маман дарялануы керек. Мемлекет басшысының айтуынша, алдағы уақытта кейбір отандық жоғары оқу орындарында «Google» және «Huawei» халықаралық компанияларының тиісті курстары өтпек. Корея мен Қытайдың жоғары оқу орындарымен білім беру және мамандарды бірлесіп даярлау бойынша келісім жасалды. Жасанды интеллект саласында жыл сайын 100 стартап іске қосу бойынша міндет қойылып отыр.
