Түркістан қаласының тұрғындарының назарына цифрлы жүйені өмірге енгізу арқылы халықтың тұрмыс сапасын арттыру, аймақтың барлық салаларын цифрландыру, шалғай ауылдарға интернет жеткізу мәселелері жөнінде мәліметтерді ұсынамыз. Мемлекет басшысы экономиканы цифрландыру ісін жалғастыру және жасанды интеллект технологиясын кеңінен қолдану аса маңызды екенін атап өткен болатын.
– Экономиканы цифрландыру ісін жалғастыру және жасанды интеллект технологиясын кеңінен қолдану аса маңызды. Біз мемлекеттік және қаржы қызметтерін цифрландыру ісінде айтарлықтай табысқа қол жеткіздік. Мәселен, 2023 жылдың қорытындысы бойынша қолма-қол ақшасыз төлем үлесі 88 пайызға жетті. 2020 жылға дейін бұл көрсеткіш 50 пайыздан аспаған еді. Небәрі төрт жылдың ішінде Қазақстанда қаржы технологиясы қарқынды дамыды. Бұл жетістік экономиканың басқа салаларына да үлгі болуға тиіс, – деді Тоқаев.
Осы орайда, отандық блокчейн-технологиялар және дата-орталықтар қауымдастығының мүшесі «TechCompany» «Блокчейн және жасанды интеллект мектебімен» бірге өткізген блокчейн негіздері мен криптовалюта, SMART келісімшарт, «NFT» және «GameFi» бойынша тегін шеберлік сағат сериясын аяқтады.
Курстар заманауи блокчейн технологиялары мен криптовалюта әлемінің негізгі ұғымын ашуға бағытталып, «NFT» және «GameFi»-ге кіріспе түрінде өтті.
«Курс сериясын ұйымымыздың тәжірибелі блокчейн әзірлеушілері жасады. Олар сабақтың әр бөліміне барлық қатысушы үшін мейлінше пайдалы әрі тиімді ақпаратты енгізді», деді «TechCompany» директоры Артур Сүндетов.
Еліміздегі блокчейн технологиялар және дата орталықтар қауымдастығының төрағасы Дәурен Қарашевтың айтуынша, «Блокчейн және жасанды интеллект мектебі» экономиканың өсуі мен ел азаматтарының цифрлық сауатын арттыруға ықпал етеді. Сондай-ақ инновациялар мен жаңа стратегиялық маңызды технологияларды дамытуға қолайлы орта жасайды.
Барлық шеберлік сағаты инновациялық технологиялар мен қаржы құралдары әлеміне бойлауға мүмкіндік береді. Бұл жоба ел тұрғындарының цифрлық сауаттылығын арттыру үшін қолға алынған.
