Бүгінгі таңда Қазақстандағы сақтандыру саласы технологиялық өзгерістерге бейімделіп жатыр.
Қаржы нарығын реттеу және дамыту агенттігінің мәліметі бойынша, соңғы 5 жылда салалық белсенділік 2,5 есе өсті. 2023 жылдың екінші жартысында сақтандыру нарығының көлемі 2,4 трлн теңгені құрады.
Сондай-ақ, қазір ел көлемінде сақтандыру сыйақыларының көлемі 2,5 еседен артып, 577,8 трлн теңгеге жетсе, сақтандыру шарттарының көлемі екі есе өсіп, 9,3 млн-ға ұлғайды. Оның 86 пайызы жеке тұлғалармен жасалған. Соңғы 5 жылда сақтандыру төлемдерінің көлемі 2,5 есе өсіп, шамамен 141 млрд теңге болды.
Сонымен қатар, сақтандыру нарығы өсімінің негізгі факторы жеңілдетілген автонесие және ипотекалық несиелендірудің мемлекеттік бағдарламаларын жүзеге асыру екені белгілі. Қазір сақтандыру нарығында цифрландыруды дамытудың 3 бағыты бар: Insurtech, Regtech және Suptech. Егер RegTech және SupTech қадағалау мен реттеуді цифрландыруға қатысты болса және оны негізінен сақтандыру ұйымдары сезінсе, онда Insurtech тұтынушы мен сақтандырушы арасындағы тікелей қарым-қатынасты цифрландыруға бағытталған.
Сарапшы Азамат Керімбаевтың пікірінше, сақтандыру нарығында 25 компания бар. Олардың 90 пайызына үйден шықпай-ақ онлайн сақтандыру полистерін ұсынуға мүмкіндік берілген. Автокөлікті сақтандыру, пәтерді сақтандыру, өмірді сақтандыру, саяхатты сақтандыру немесе медициналық сақтандыру болсын, кез келген полисті онлайн тіркеу қазір бірнеше минутты алады. Ал қашықтан төлегеннен кейін сатып алушының электрондық поштасына құжат жіберіледі.
Биылғы 1 қаңтардан бастап жұмыс істей бастаған цифрлық инновациялардың бірі жазатайым оқиғадан кейін сақтандыру төлемін жылдам алу құралы – Еурохаттама болды.
