Цифрландыру үдерісі – тоқтаусыз алға қарыштап дамып бара жатқан әлемдік тренд. Бұл әлемдік трендтен еліміз тыс қала алмайды. Сондықтан жаһандық трендке жылдам бейімделіп, еліміз экономикалық, инновациялық және технологиялық тұстарын жетік меңгеріп, пайдалы жақтарын барынша алуға тиіс.
Бұл орайда, жастар өздері қарайтын желілердегі танымал тұлғалардың ықпалына қалай түсіп, санасына қандай идеяларды сіңіріп жатқанын байқамай қалуы мүмкін.
Осылайша, әлеуметтік желілерде кең көлемде өзіне лояльды аудиториясы бар белсенді қолданушылар түрлі қауесет пен болжамды айта отырып, қасақана арандату арқылы шындықты әдейі бұрмалау сияқты манипуляциялау технологияларын қолданады.
Философия, саясаттану және дінтану институты Саяси зерттеулер орталығының жетекші ғылыми қызметкері Нүркен Айтымбетовтың сөзінше, деструктивті саяси көзқарастардың, «фейк» ақпараттардың әлеуметтік желілер мен БАҚ-та кеңінен таралуы, қоғамды бағдарынан адастырып қана қоймай, жастардың көңіл күйі мен мінез-құлқына кері әсерін тигізеді. Бұл өз кезегінде жастардың ел ішіндегі саяси жағдайды түсінудің шынайылығын бұрмалауы мүмкін. Салдарынан ақпараттық кеңістікте интернет белсенділердің саяси мақсаттарын, қоғамдық пікірін, наразылық көңіл күйін білдіретін құралына айналу қаупі бар. Ондай жағдайда әлеуметтік желілер тез арада түрлі наразылық, қарсылық білдіруші электоратты жұмылдыратын құралға айналып кете алады. Оны біз кейінгі жылдары еліміздің әр түкпірінде болған этносаралық және әлеуметтік қақтығыстардан көре алдық.
Ал жастардың ақпараттар ағымын сараптап, сыни ойлау қабілетін дамыту қажет. Жастар барлық мәселені рационалды және демократиялық тәсіл тұрғысынан қарастыруға тиіс.
