Мемлекет басшысының айтуынша, алдағы уақытта кейбір отандық жоғары оқу орындарында «Google» және «Huawei» халықаралық компанияларының тиісті курстары өтпек. Корея мен Қытайдың жоғары оқу орындарымен білім беру және мамандарды бірлесіп даярлау бойынша келісім жасалды. Жасанды интеллект саласында жыл сайын 100 стартап іске қосу бойынша өршіл міндет қойылып отыр.
Елімізде бірнеше жылдан бері әр салада цифрландыру жұмыстары үздіксіз жүргізілуде.
Осы орайда «Азаматтарға арналған үкіметтің» ең ірі жобаларын атап өтсек болады. Олар: «ХҚКО» мобильді қосымшасының іске қосылуы; «Бірыңғай мемлекеттік жылжымайтын мүлік кадастры» жүйесінің құрылуы; АХАТ қызметінің Мемлекеттік корпорацияға өтуі; connection points желісін құру– мемлекеттік қызметтерді қоғамдық орындарда, мысалы, сауда орталықтарында алу мүмкіндігі; жол жүру ережелері бойынша емтихан тапсыру ЖЖЕ 3.0 жүйесін енгізу.
Тағы бір айта кетерлік жаңалық – өткен жылы Үкіметте азаматтарға арналған жаңа цифрлық қызметтердің жұмысы талқыланған болатын. Премьер-Министрдің орынбасары төрағалық еткен кеңесте қазақстандықтардың өмірін жеңілдетуге бағытталған жаңа «цифрлық» бастамаларды жүзеге асыру мәселелері қаралып, оған цифрландыру жөніндегі вице-министрлер, Астана қаласы әкімдігі, екінші деңгейлі банктер мен «Атамекен» ҰКП өкілдері қатысқан еді. Сол кезде 2023 жылы республикада мемлекеттік қызметтерді онлайнға көшіру арқылы азаматтардың іскерлік және тұрмыстық мәселелерін шешуін жеңілдетуге және жеделдетуге бағытталған 66 «цифрлық» бастама жүзеге асырылып жатқаны мәлім болған еді.
Мемлекет басшысының мемлекеттік органдарға және олардың халықпен өзара байланысына бюрократия ықпалының жоғары екені туралы пікіріне сүйене отыра, сондай-ақ әлемдік тәжірибені ескеріп, сыбайлас жемқорлық пен бюрократиямен күрестегі бірден-бір тиімді жол — цифрландыру деп сеніммен айта аламыз. Басты міндет — әрбір азаматтың цифрландырудың нақты нәтижесін сезінуін қамтамасыз ету. Қазір азаматтарға жоспарланған «цифрлық» бастамалардың 41-і толық немесе пилоттық режимде қолжетімді.
