Елімізде дербес деректерді қорғау саласындағы уәкілетті орган анықталған. Ол – Цифрлық даму, инновациялар және аэроғарыш өнеркәсібіне қарасты Ақпараттық қауіпсіздік комитеті. Цифрлық қоғам — адамдардың өмір жағдайына, олардың біліміне жəне жұмысына, сонымен қатар мемлекет, бизнес жəне қоғам арақатынасына ақпараттық-коммуникациялық технологиялар арқылы шешуші əсер ететін, қоғам өмірінің барлық салаларында білім мен ақпараттық доминантты рөлімен ерекшеленетін өркениет дамуының заманауи кезеңі. Былтыр дербес деректерді жинау және өңдеу қағидалары бекітілді. Сондай-ақ өткен жылы электронды ақпараттық ресурстардағы дербес деректерді қорғау талаптарын, электронды құжат пен электронды цифрлық қолтаңба туралы заңнаманы бұзғаны үшін жауапкершілікке тарту тәжірибесі басталды. Одан бөлек, 17 орталық мемлекеттік орган вирусқа қарсы қорғау, компьютерлік шабуылдарды және ақпараттың таралуын болдырмау, ақпараттық қауіпсіздік оқиғаларына мониторинг жүргізу құралдарымен жарақтандырылды. Соның нәтижесінде мемлекеттік органдарда ақпараттық қауіпсіздіктің 4 мың оқыс оқиғасына әкеп соққан оқиғалардың 55 мыңнан астам бірегей түрі тіркелген.
Кибершабуылдардың өмірімізге дендеп енгені сол, халықтың көзге көрінбейтін қауіп-қатерлерден хабардар болу көрсеткіші де жақсарған. Өткен жылдың қыркүйек айында жүргізілген әлеуметтік зерттеудің қорытындысына сүйенсек, былтыр халықтың киберқауіптен хабардар болу көрсеткіші 78 пайызды құраған.
Айтпақшы, Үкіметтің «Ақпараттық-коммуникациялық технологиялар және ақпараттық қауіпсіздікті қамтамасыз ету саласындағы бірыңғай талаптарды бекіту туралы» Қаулысына өзгерістер мен толықтырулар енгізу жоспарлануда. Бүгінде тиісті ұсыныстарды әзірлеу үшін арнайы жұмыс тобы құрылған. Бағдарлама жоспарына сәйкес, отандық IT-компанияларға ақпараттық-коммуникациялық инфрақұрылымның ұлттық қауіпсіздік жүйелерінің жұмысына қатысу мүмкіндігі берілуі тиіс.
Киберқылмыс күшейген сайын, киберқауіпсіздік жүйесін жетілдіріп отыру маңызды екені айтпаса да түсінікті. Осы орайда, Президент Қасым-Жомарт Тоқаев өткен Жолдауында бірқатар тапсырма берді. Атап айтқанда, «Цифрлық Қазақстан» бағдарламасын Ақпараттық-коммуникациялық технологиялар саласын және цифрлық саланы дамыту тұжырымдамасына трансформациялау бойынша жұмыс жүргізілді. Оны іске асыру үшін «Цифрлық өмір салты» (DigitEL) ұлттық жобасы әзірленді.
